Nyayacandrika 1.p210

1.p210

caturthaparicchede—viṣayākāropaplutavijñānasantānoparamo mokṣa iti vijñānavādināṃ mokṣanirasanena mokṣasvarūpaṃ citsukhācāryo'vatārayati-“ kaḥ punarayaṃ mokṣa ” ityādinā | nyāyacandrikā tu—“ atha bhoḥ ka eṣa mokṣo nāma ? śarīramokṣa eva mokṣa iti bārhaspatyāḥ ; alokākāśe satatodhrvagamanamityārhatāḥ ; saṃsārisantānoparamaḥ, caramaviśuddhajñānodayoveti saugatāḥ ” ityādinā cārvākārhata-saugatamādhyamika-vaiśeṣika-naiyāyika - prābhākara-kapila - sammatatattanmokṣasvarūpavivecanapūrvakam “ avidyāstamayo mokṣa iti prāmāṇyagāminaḥ | ” ityadvaitābhimataṃ mokṣasvarūpaṃ nyāyacandrikā saṅgṛhṇāti | tatra cārvākādisarvadarśanasammatamokṣasvarūpaparijñānam , tannirasanaprakāraśca sulalitaṃ na vinā nyāyacandrikāmanyena jñātuṃ suśakaḥ