Prapancahridaya 2.p56

2.p56

tathāsamānatantro vaiśeṣikaḥ sarvamidamaṅgīkaroti | mokṣapadārthaparijñāne matebhedaḥ | tatra dravyaguṇakarmasāmānyaviśeṣasamavāyānāṃ sādharmyavaidharmyatattvajñānaṃ niḥśreyasaheturiti | tatra pṛthivyaptejovāyvākāśakāladigātmamanāṃsīti nava dravyāṇi | śabdasparśarūparasagandhasaṃyogavibhāgasaṅkhyāparimāṇaparatvāparatvapṛthaktvagurutvadravatvavegabuddhisukhaduḥkhecchādveṣaprayatnadharmādharmasaṃskārāścaturviṃśatiguṇāḥ | karma pañcavidham utkṣepaṇāvakṣepaṇākuñcanaprasāraṇagamanabhedena | sāmānyaṃ dvividhaṃ paramaparaṃ ca | paraṃ sattāsāmānyam | aparaṃ manuṣyatvapaśutvādikam | viśeṣo vyaktiviśeṣagato'nantaḥ | samavāyaḥ sarvatrādhārādheyabhūtayoḥ pṛthaksiddhayorapṛthagbhūtasambandhaḥ | ṣaḍete vaiśeṣikapadārthāḥ | teṣāṃ sādharmyaṃ samānadharmatvam | vaidharmyaṃ viṣamadharmatvam | tadubhayajñānaṃ śāstraprameyaṃ mokṣahetuḥ | tatpramāṇaṃ trividhaṃ pratyakṣānumānāgamabhedena | tatrātmamanaindriyārthasaṃyogakramajanitaṃ jñānaṃ pratyakṣam