Prapancahridaya 3.p9

3.p9

yadavacchedakaṃ taddhi deho janmavināśavat || caitanyāvarako dehaścaitanyādeva jāyate | yathaiva kālimādarśe yathā dhūmastu pāvake || pañcakośamayo deho rambhāstambhopamaḥ smṛtaḥ | tadantaḥsthaḥ sthiro jīvo rambhāgarbhopamaḥ smṛtaḥ || bāhyamannamayaṃ kośamantaḥ prāṇamayaṃ tathā | manomayaṃ tadantarastu vijñānamayameva ca || ānandamayamityevaṃ kośaṃ pañcavidhaṃ viduḥ | māyayā tvadhikāriṇyā yadātmopahito bhavet | svarūpaikarasaḥ kośastasyānandamayastadā || vaṭabīje vaṭo vṛkṣastadantarhitavigrahaḥ | nibhṛtaḥ sarvarūpeṇa vartate tu yathā tathā || triṣu bāhyeṣu kośeṣu vijñānaṃ tu yadā sthitam | tad visṛjya svayaṃ bhāti sa vijñānamayaḥ smṛtaḥ || lohabhāvaṃ tiraskṛtya vahniloṃhagato yathā | svaṃ rūpaṃ bhāsayatyeva svaprakāśavaśāt tathā || sattvādiguṇasaṃyuktamanaḥpūrvāntarendriyaiḥ | yukto manomayaḥ kośa ātmanaḥ parikīrtitaḥ || kṣīranyāsaṃ yathā sarpiḥ prāṇānnamayakośagam | caturdaśānā vāyūnā prāṇādīnāṃ tu saṃhatim || vyāpāraśaktiyuktānāṃ kośaṃ prāṇamayaṃ viduḥ | bāhye'nnamayakośe'smin vyāpakatvena saṃsthitam