Tattvapradipika p208

p208

nanu kimidaṃ prāmāṇyasya svataḥstvaṃ, na tāvatsvata eva janma| svasya svahetukatvavirodhāt | nāpi pramāṇādeva janma | jñānasya guṇatvena svaprāmāṇyaṃ prati samavāyikāraṇatvāsaṃbhavāt | nāpi jñānasāmagrīto janma | prāmāṇyasyopādhittve jātitve ca janmāsaṃbhavāt | tathāhi upādhipakṣe smṛtitvānadhikaraṇasya jñānasya bādhātyantābhāvaḥ prāmāṇyam | naca tasyotpattiḥ saṃbhavati| atyantābhāvatvādeva| nāpi jāterjanma| nityatvāt | jñānasāmagrījanyatvaṃ pramāyāḥ prāmāṇyām̐sya svataḥstvamiti cennaivam | apramāyā api svataḥstvaprasaṅgāt, tasyā api jñānasāmagrījanyatvāt | atha jñānasāmagrīmātrajanyatvaṃ svataḥstvam apramā tu na tanmātrajanyā doṣasahakṛtajñānasāmagrījanyatvāditi cennaivam | vikalpāsahatvāt | tathāhi | doṣābhāvasahakṛtajñānasāmagrījanyatvaṃ mātraśabdārthaḥ kiṃvā doṣāsahakṛtajñānasāmagrījanyatvam | nādyaḥ | parataḥprāmāṇyavādamatānupraveśaprasaṅgāt | tepi hi doṣābhāvasahakṛtajñānasāmagrījanyatvameva parataḥprāmāṇyamitīcchanti | nāpi dvitīyaḥ | viśeṣadarśanasya bhramanivṛttihetutve tadviparyayasya bhramahetutvavaddoṣasahakṛtajñānasāmagrījanyaṃ jñānamaprametyaṅgīkurvatā pramāṃ prati doṣābhāvasya hetutāyā anirākāryatvāt