Tattvapradipika p214

p214

bāhyendriyapratyakṣaviṣayatvānupapatteḥ | nāpi dvitīyaḥ | jñānagrāhakamātragrāhyatve prāmāṇyasya kvacidapi jñāne pramāṇamapramāṇaṃ veti saṃśayābhāvaprasaṅgāt | nanu jñānagrāhakamātragrāhyatve'pyarthaviśeṣitatvasya sāṃśayikatvavatprāmāṇyasyāpi sāṃśayikatvamupapadyate | tathāhi kumbhajñānasyāmbho viṣayo'bhūnnaveti saṃśayānā dṛśyante janāḥ sāmbhasāmanambhasāmapi kumbhānāmupalambhāt | evaṃ prāmāṇyepi saṃśayaḥ kiṃ na syāditicenmaivam | ambhasaḥ kumbhagrāhakasāmagrīmātragrāhyatvānaṅgīkārāt aṅgīkāre vā'viśeṣeṇa sakalakalaśānāṃ salilavattvaprasaṅgāt | tasmānnārikelaphalāntargatasalilādivadbhinnasāmagrīgrāhyatvādeva tatra saṃśayaḥ | prāmāṇye tu na tatheti yuktamutpaśyāmaḥ | kiṃca vijñānagrāhakasāmagrīmātragrāhyatāyāṃ prāmāṇyasya śuktikārajatādibuddhiṣvapi tadgrahaprasaṅgaḥ | satyaṃ gṛhītameva tat bādhakādapanīyate yathāhuḥ—'tasmādbodhātmakatvena prāptā buddheḥ pramāṇatā | arthānyathātvahetūtthadoṣajñānerapodyate ||' iti | tasmādasmākamiṣṭaprasañjanamiti cet | maivam | parataḥprāmāṇyaprasaṅgāt | tathāhi prasaktamapi prāmāṇyaṃ rajatādibuddhiṣu bādhakajñānādapanīyata iti vadatā bādhakajñānābhāvanibandhanameva prāmāṇyāvadhāraṇamabhyupagataṃ syāt