Bhagavadgita 2.297

2.297

yaḥ kaścidavivekī enaṃ prakṛtaṃ nityaṃ śarīriṇaṃ śarīre vidyamānaṃ jīvaṃ
hantāraṃ hananakriyāyāḥ kartāraṃ vetti jānāti yaśca yo vā'vivekī enaṃ nityaṃ
śarīriṇaṃ jīvaṃ hataṃ hananakriyāyāḥ karmabhūtaṃ vettītyanukarṣaḥ | tāvubhau
na vijānītaḥ ātmatattvaṃ na jñānavantau aviveki-nāvityarthaḥ | kuta ityatrāha
nāyamiti | ayaṃ śarīrī na hanti nahi hananakartā bhavati | tathaiva na hanyate na ca
hananakarmāpi bhavati | etadubhayamapi ātmano jīvasya na kadāpi saṃbhavet | nanu
nityatvāt jīvasya hananakarmatvaniṣedho yujyate | kathaṃ vā hananakartṛtvasyāpi
niṣedhaḥ saṃbhavet ? nityatvakartṛtvayornahi virodhaḥ | sanātano'pi cetanaḥ
yadyapi badhyo na bhavet tathāpi hananakartā bhavitumarhatyeva iti cet nātrātmanaḥ
kartṛtvasāmānyaṃ niṣidhyate | kintu hananakartṛtvaṃ
tatrāpyātmakarmakahananakartṛtvam | ātmanaḥ nityatvāt tatkarmakahananaṃ
aprasiddhameva | yadā cātmakarmakahananamevāprasiddhaṃ tadā
tādṛśahananakartṛtvaṃ vā kasya syāt ? śaśaśṛṅgasyaiva
aprasiddhatve śaśaśṛṅgakartṛtvaṃ nahi kasyacidbhavitumarhati | ataḥ
ātmakarmakahanana-kartṛtvaniṣedhe na ko'pi doṣaḥ saṃbhavet || 19 ||