Bhagavadgita 3.34

3.34

ta0 ṭī0-saṃgrāmatyāge na kevalaṃ bhāvisvadharmakīrtihānimātramapi tu mahāndoṣaḥ syādityāhaakīrtimiti | kṣatriyaharṣakare saṃgrāme prāpte pāṇḍuputro gāṇḍīvadhanvā'rjunaḥ kātaro bhūtvāpalāyita ityavyayāṃ bahujanadṛṣṭaśrutaparamparayā sarvadeśavyāpinīṃ punaravināśinīṃ te'kīrtiṃ na kevalaṃ kṣatriyāḥ kathayiṣyanti kintu devarṣikṣatriyavaṇikśūdrāntāni sarvāṇi bhūtāni kathayiṣyanti | nanu yuddhe maraṇasandehānmaraṇādakīrtirnādhiketyataḥ sā soḍhavyā na tu maraṇopāyaṃ kuryāt | tathoktaṃ śāntiparvaṇi'sāmnā dānena bhedena samastairuta cāpṛthaka | vijetuṃ prayatetārīnna tu yuddhyetkadācana || anityo vijayo yasmāddṛśyate yudhyamānayoḥ | parājayaśca saṃgrāme tasmādyuddhaṃ vivarjayet' iti tasmānmaraṇādakīrtiḥ kimadhikaṃ duḥkhamityata āha-sambhāvitasyeti | khāṇḍave indreṇā'pyanivāryo vāsudevasakhā'gnitarpaṇādyatulyaparākramairanyadurlabhairguṇairbahumatasyākīrtirmaraṇādatiricyate adhikā bhavati |