Bhagavadgita 3.47

3.47

ta0 ṭī0-nanu yadyevaṃ tarhi mumukṣuṇā jñānaniṣṭhaiva sampādanīyā, kiṃ karmaṇeti cettatrāha-karmaṇyeveti | te tava mumukṣoḥ tattvaniṣṭhāpādanāya tāvadantaḥkaraṇaśuddhyarthaṃ karmaṇyevādhikāro'sti | na ca karmaṇyadhikṛtasya me tatrā''saktyā'vyavasāyātmikā buddhiḥ syāditi vācyamityāha-mā phaleṣu kadācaneti | karmaphaleṣu te'dhikāro mā bhūt | nahi phalecchāṃ tyaktvā karma kurvato'vyavasāyātmikā buddhirbhavati api tu phalāsaktasyaiva | nanu phalecchābhāve'pi karma kurvataḥ phalāvāptiḥ syādeveti cettatrāha-mā karmaphalaheturbhūriti | matkṛtasya karmaṇa idaṃ phalamityātmānaṃ phalaṃ prati hetuṃ mā bhāvayethāḥ | phaloddeśaṃ vinaiva karma kurvityarthaḥ | nanu niṣphalakarmakaraṇādakaraṇameva jyāyo ‘na kuryānniṣphalaṃ karma’ iti niṣiddhatvāditi cettatrāha-mā te saṃgo'stvakarmaṇīti | akarmaṇi karmākaraṇe tava mumukṣoḥ saṃgo na, yotsyāmītyahaṃkāro mā'stu nityanaimittikākaraṇe pratyavāyāpatteḥ ‘mokṣārthī na pravarteta tatra kāmyaniṣiddhayoḥ | nityanaimittike kuryātpratyavāyajihāsayā’ iti manusmaraṇāt |