Bhagavadgita 3.46

3.46

ta0 ṭī0-nanu vedaviṣayaparityāge tadarthātiriktapadārthābhāvānmumukṣorapi sādhanānuṣṭhānādyapekṣitaṃ sarvaṃ heyaṃ syāttathātve tasya svārthabhraṃśa eva syāditi cettatrāha-yāvāniti | yathā snānapānādyarthinaḥ puruṣasya udapāne vāpīkūpataḍāgādiṣu yāvānyāvatparimāṇaḥ snānapānādyarthaḥ sarvataḥ saṃplutodake bahudeśaprasṛtajalasamūhe mahānadyādiṣu tāvānevārthaḥ | evaṃ vedārthaṃ vijānataḥ brāhmaṇasya brahmajñasya mumukṣoriti yāvat | vedekadeśe yāvānarthaḥ svaśreyaḥsādhanabhūtasarvadeveśabhagavattoṣakaraṃ karmācaraṇaṃ prayojanaṃ tāvāneva sarvavedeṣvarthaḥ prayojanaṃ, natu vedoktaṃ sarvaṃ sarvairupādeyaṃ kintu yathādhikārameva | yathā vedoditamevāgnihotraśrāddhapitṛtarpaṇādikaṃ karma na saṃnyāsinā'nuṣṭheyamanadhikārāta | kintu pravṛttiniṣṭhagṛhasthasyaiva tatrādhikāraḥ | saṃnyāsināṃ tu snānapraṇavajapatattvānusandhānayāvaddehayātrāmānnābhikṣāvasanopādānameva vedoditamanuṣṭheyaṃ tadvaditi vivekaḥ |