Bhagavadgita 2.31.2

2.31.2

tena bhūmipālasyaivāyaṃ dharma iti na bhramitavyam | udāhṛtavacane'pi kṣatriyo hīti kṣātraṃ dharmamiti ca spaṣṭaṃ liṅgam | tasmātkṣatriyasya yuddhaṃ praśasto dharma iti sādhu bhagavatābhihitam 'apaśavo'nye goaśvebhyaḥ paśavo goaśvāḥ' itivatpraśaṃsālakṣaṇayā yuddhādanyacchreyaḥsādhanaṃ na vidyata ityuktamiti na doṣaḥ | etena yuddhātpraśastataraṃ kiṃcidanuṣṭhātuṃ tato nanu yuddhasya kartavyatve'pi na bhīṣmadroṇādibhirguurubhiḥ saha tatkartumucitamatigarhitatvādityāśaṅkyāha- yadṛcchayā aprayatnavyatirekeṇa | co'vadhāraṇe | aprārthanayaivopasthitamīdṛśaṃ bhīṣmadroṇādivīrapuruṣapratiyogikaṃ kīrtirājyalābhadṛṣṭaphalasādhanaṃ yuddhaṃ ye kṣatriyāḥ pratiyogitvena labhante te sukhabhāja eva | jaye satyanāyāsenaiva yaśaso rājyasya ca lābhāt, parājaye cātiśīghrameva svargasya lābhādityāhasvargadvāramapāvṛtamiti | apratibaddhaṃ svargasādhanaṃ yuddhamavyavadhānenaiva svargajanakam | jyotiṣṭomādikaṃ tu ciratareṇa | dehapātasya pratibandhābhāvasya cāpekṣaṇādityarthaḥ | svargadvāramityanena śyenādivatpratyavāyaśaṅkā parihṛtā | śyenādayo hi vihitā api phaladoṣeṇa duṣṭāḥ | tatphalasya śatruvadhasya 'na hiṃsyātsarvā bhūtāni', 'brāhmaṇaṃ na hanyāt' ityādiśāstraniṣiddhasya pratyavāyajanakatvāt phale vidhyabhāvācca na 'vidhispṛṣṭe niṣedhānavakāśaḥ' iti nyāyāvatāraḥ | yuddhasya hi phalaṃ svargaḥ sa ca na niṣiddhaḥ | tathāca manuḥ-'āhaveṣu mitho'nyonyaṃ jighāṃsanto mahīkṣitaḥ | yudhyamānāḥ paraṃ śaktyā svarga yāntyaparāṅmukhāḥ ||' iti |