Bhagavadgita 3.46

3.46

yadi māmiti | apratīkāraṃ kṛtasya pratikriyā pratīkārastāḍayantaṃ prati tāḍanaṃ pāpabhītyā dayayā cānuraktyā ca tamakurvantam | ata evāśastraṃ parityaktāyudhaṃ māṃ dhārtarāṣṭrāḥ svayaṃ śastrapāṇayaḥ santo raṇe yadi hanyurnirdākṣiṇyena dharmaṃ tyaktvā māṃ hiṃsyuścettaddhananaṃ mama svadharmaniṣṭhasya kṣematarameva bhavet kṣemāyaiva bhavati | ‘aprāptaprāpaṇaṃ yogaḥ kṣemastu sthitarakṣaṇam’ iti nyāyena sthitasya paripālanaṃ kṣemastasmādadhikaḥ kṣemataraḥ kulanāśanadoṣataddhetukanarakapātaduṣkīrtyādyanartharāhityena prākṛtapuṇyapuñjasya kṣayabhāva eva kṣemataraśabdārthastasmādeva bhavatītyarthaḥ |
‘parīkṣya lokānkarmacitānbrāhmaṇo nirvedamāyānnāstyakṛtaḥ kṛtena | tadvijñānārthaṃ sa gurumevābhigacchetsamitpāṇiḥ śrotriyaṃ brahmaniṣṭham’ ityādiśrutyuktarītyā mumukṣurbrāhmaṇo vidvān karmaṇāṃ karmaphalānāṃ tadātṝṇāṃ ca kleśakaratvānityatvasaṃsāritvādidoṣavattvaṃ karmakartṛṇāṃ ca jananamaraṇapravāhapātānapāyitvaṃ nirantarasaṃsāraduḥkhābhoktṛtvādyanarthaparamparāṃ ca śrutismṛtiyuktibhirniścitya mokṣaikakāmanayā svayamasto virajyū sahasādhanaṃ karma saṃnyasya muktyai sadgurumupasīdeditīmamarthaṃ sūcayitumarjunasya sadasadvicāramasatpravṛttau paritāpamadharmaprāpte rājye tatsukhādau doṣadarśanaṃ vairāgyaṃ ca pratipādyedānīṃ hiṃsāsādhanabhūtaśastrasaṃnyāsaṃ yuddhakriyānivṛttiṃ ca pratipādayanradhyāyamupasaṃharati—