Bhagavadgita 3.47

3.47

evamiti | arjunaḥ saṃkhye satyevaṃ 'dhārtarāṣṭrā raṇe hanyustanme kṣemataraṃ bhavet'ityevaṃprakārakaṃ vacanamuktvā śokasaṃvignamānasaḥ svajanavināśaṃ nimittīkṛtya samutpannena śokena saṃvignaṃ mānasaṃ yasya sa tathoktaḥ sansaśaraṃ cāpaṃ visṛjya | nāhaṃ yoddhuṃ śakṣyāmīti rathopasthe rathasyoparyyupāviśat | upaviṣṭavānityarthaḥ| etena sadasadvivekavataḥ paramārthopekṣiṇo mumukṣoranityātsvargādisukhādasataḥ sakāśādvirajya tatsādhanaṃ sarvaṃ saṃnyastavyamiti sūcitaṃ bhavati | tathāca śrutiḥ—'parīkṣya lokānkarmacitānbrāhmaṇo nirvedamāyāt' iti, 'yadahareva virajettadahareva pravrajet' iti |
iti śrīparamahaṃsaparivrājakācārya śrīmadānandātmasarasvatīśiṣyaśrīśaṃkarānandasarasvatīkṛtau gītātatparyabodhinyāṃ prathamo'dhyāyaḥ |
sadasadvivekena tajjanitatīvravairāgyeṇa mumukṣayā ca saṃnyastasarvakarmaṇo mokṣaikakāmasya brāhmaṇasya sadasadvivekavairāgyādisādhanasaṃpatsiddherbrāhmaṇatvasiddheśca sākalyāya 'athāto brahmajijñāsā' iti, 'ātmā vā are draṣṭavyaḥ śrotavyaḥ' iti, 'tadvijñānārthaṃ sa gurumevābhigacchet' ityādiśrutyuktaprakāreṇa sadguruṃ śrotriyaṃ brahmaniṣṭhamupasadya brahmavicāraḥ kartavya itīmamarthaṃ sūcayituṃ sadasadvivekino'rjunasya paramārthopekṣiṇaḥ 'śiṣyaste'haṃ śādhi māṃ tvāṃ prapannam' itīśvarapratipattiṃ tasmai īśvareṇa kṛtamātmānātmajñānopadeśaprakāraṃ ca pratipādayituṃ dvitīyo'dhyāya ārabhyate | tatrādau 'so'haṃ bhagavaḥ śocāmi taṃ mā bhagavāñśokasya pāraṃ tārayatu' iti śravaṇātsaṃsāraduḥkhena śocantaṃ svaśaraṇaṃ gataṃ mumukṣumabhayavacanapūrvakamabhimukhīkṛtya gurustattvaṃ bodhayediti sūcayituṃ, tathā śocantamarjunaṃ vivekavacanairbhagavānbodhayāmāseti vaktuṃ dhṛtarāṣṭraṃ prati saṃjaya uvāca— saṃjaya uvāca |