Bhagavadgita 4.37

4.37

hatoveti | yuddhe karṇādibhirhato vā nihataśca tvaṃ svargaṃ prāpsyase | ripūn jitvā jitavāṃścenniṣkaṇṭakāṃ mahīṃ bhokṣyase | yasmādyuddhamubhayathā phalāyaiva bhavati natu viphalāya, tasmādyuddhāyaiva kṛtaniścayaḥ san he kaunteya, uttiṣṭha | sannaddho bhavetyarthaḥ |
nanu hato vā prāpsyasi svargamiti vākyena yuddhasya aihikāmuṣmikasukhasādhanatvameva pratīyate natu dharmāddhi yuddhācchreyo'nyadityuktanyāyena śreyaḥsādhanatā vidyate | tata indriyārāmāṇāṃmeva kartavyaṃ yuddhaṃ, yataḥ svargādisukhahetutvaṃ yuddhasya dṛśyate tato bandhakatvānna paramārthāpekṣāvatāmityāśaṅkāyāṃ | na | bhāvanābhedādatra tatphalabhedo'pyasti | yathā jyotiṣṭomaḥ svargakāmanayā kṛtaḥ svargaheturakāmanayā cittaśuddhihetuḥ, tadvadyuddhaṃ prajāparipālanaṃ dānaṃ ca kāmākāmābhyāṃ svargādiphalāya cittaśuddhaye ca bhavati | śreyaskāmaścettvaṃ yuddhamakāmanayaiva kurvityāha—