Bhagavadgita 7.15

7.15

nādatta iti | niravayatvānniṣkriyatvācca vibhurvyāpakaḥ svayamātmā bhaktasya vāpyanyasya vā yasya kasyacitpāpaṃ nādatte brāhmaṇo hiraṇyagarbhamiva na gṛhṇāti | nanu ‘harirharati pāpāni duṣṭacittairapi smṛtaḥ’, ‘anekajanmārjitapāpasaṃcayaṃ haratyaśeṣaṃ smṛtamātra eva’ ityādivākyairbhaktakṛtaṃ pāpaṃ bhagavānādatta iti pratipādyata iti cetsatyam| pratipādyate tatpratipādanaṃ nāma kīrtanaprāyaścittyā'nātmajñaṃ tatpāpānmocayitumeva bhavati natu paramātmano vikāritvaṃ saṃpādya tatpāpādānapratipādanāya | etat ‘tasmātsaṃkīrtanaṃ viṣṇorjaganmaṅgalamaṃhasām | mahatāmapi kauravya viddhyaikāntikaniṣkṛtim | ekā viniṣkṛtiḥ śaṃbhoḥ sakṛdeva hi kīrtanam’ ityādivacanebhyo'vagamyate | anyathā nirvikāratvapratipādakabahuśrutivirodhaprasaṅgāt | kiṃca yasya kasyāpi bhaktasya vānyasya vā bhaktyā samarpitaṃ śrautasmārtakarmānuṣṭhānajanyaṃ sukṛtaṃ ca naivādatte vahnirāhutimiva na kiṃcidgṛhṇāti | nanu tarhi ‘dharmāvahaṃ pāpanudaṃ varadaṃ devamīḍyaṃ’ ‘prabhuṃ prīṇāti’ ‘patraṃ puṣpaṃ phalaṃ toyam’ ityādiśrutismṛtivākyānāmaprāmāṇyāpāta iti
cenna | mumukṣoḥ sattvaśuddhikāmasya parameśvaropāstau tanmahattvapratipādanena rucyutpādanaparatvātteṣāṃ vākyānāṃ 'vāẏurve kṣepiṣṭhā daivatā' ityādivākyavatprāmāṇyopapatteḥ | nanu paṇḍitāścāpyapaṇḍitāśca sarve jñānasaṃdhyānuṣṭhānayajñadānādijaṃ phalamīśvarāyaiva samarpayanti gṛhṇātīśvara iti tatkathamityākāṅkṣāyāṃ te vedāntavicārajanyajñānābhāvādeva tathā kurvantītyāśayenāha-ajñāneneti | ātmano dehendriyādibhyo bhinnatvāvikriyatvacidrūpatvaparipūrṇatvākhaṇḍānandaikarasatvavedanaṃ jñānaṃ tadvilakṣaṇamajñānaṃ tenoktalakṣaṇaṃ jñānamāvṛtaṃ rāhuṇā ravibimbavattirohitaṃ tenaiva paramātmatattvā'vivekena jantavaḥ prāṇinaḥ sarve'pyahaṃ mametyanena karmaṇeśvaraḥ prīyate mahyamīpsitaṃ dāsyati bhokṣye bhojayiṣyāmīti muhyanti | paratattvamajānantaḥ santaḥ saṃsarantītyarthaḥ |
nanu sarveṣāmajñānāvṛtajñānatve kathaṃ mumukṣūṇāmātmajñānāvirbhāvaḥ kathaṃ vā teṣāṃ muktirityākāṃkṣāyāmīśvaraprītyai kṛtanityanaimittikakarmānuṣṭhānena yadā cittaparipākastadā samyak jñānamudetyajñānaṃ nāśayitvā paraṃ tattvaṃ prakāśayati tadā te muktiṃ gacchantītyāśayenāha-