Bhagavadgita 7.16

7.16

jñāneneti dvābhyām | tuśabdo jñānavyatiriktasyājñānanāśakatvāsaṃbhavadyotanārthaḥ | karmopāstibhyāṃ paripakvacittānāṃ yeṣāṃ jñānena tu śravaṇādisamutpannenātmaviṣayakeṇātmano buddheḥ saṃvandhibuddhiniṣṭamityetat jñānājñānayorbuddhidharmatvādāvṛtiranāvṛttiśca paṭalena cakṣuṣa eva natu ghaṭasya | tadvadajñānaṃ jñānaṃ ca buddherevāstu nātmanaḥ anyathā'hamiti pratyayānutpatteḥ, tato buddhisaṃvandhyevājñānaṃ yena mohitāḥ saṃsaranti prāṇino yatsarvānarthabījaṃ tadajñānaṃ nāśitaṃ bhavati sūryodayena timiramiva vidhvastaṃ bhavati teṣāṃ śuddhātmanāṃ samutpannaṃ tajjñānamādityavadyathodita ādityaḥ padārthajātaṃ prakāśayati tathā, tatsarvavedāntaprasiddhaṃ satyajñānādilakṣaṇaṃ pratyagabhinnaṃ paraṃ brahma prakāśayati sūryaprakāśena sthāṇurevāyamiti yathā tathā jñānaprakāśena brahmaivāhamiti svaṃ brahmaiva vijānantītyarthaḥ |
'tena tyaktena bhuñjīthā mā gṛdhaḥ kasyasviddhanam' ityādiśrutyuktarītyā videhakaivalyārthibhiḥ samutpannajñānasya saṃrakṣaṇaṃ kartavyaṃ sadātmaniṣṭhayā sthitvā na kiṃcidbāhyaṃ draṣṭavyamiti bodhayitumāha-