Bhagavadgita 5.60

5.60

viṣayaviṣayakarāganivṛtterapi sthitaprajñalakṣaṇaghaṭakatayā vivakṣitatvād nātivyāptirityāśayena, sa rāgaḥ kathaṃ saṃhriyate iti cāha bhagavān dayānidhirviṣayā iti | vyākhyā—nirāhārasya indriyairviṣayagrahaṇam akurvataḥ, dehino dehābhimāninaḥ, kaṣṭe tapasi sthitasya mūrkhasya (api) viṣayā lakṣaṇayā indriyāṇi athavā śabdādiviṣayā'nubhavāḥ, vinivartante viduṣa iva viśeṣeṇa nivartante | ādye viṣayebhya iti śeṣaḥ | antye indriyebhya itiśeṣaḥ | (kintu) rasavarjam raso rāgo viṣayeṣu yastaṃ varjayitvā vihāya (vinivartante) | mūrkhasya raso na nivartate ityarthaḥ | rasavarjamiti (dvitīyāyāṃ ca' (pā. sū.) iti ṇamul | raso'pi raso rañjanarūpaḥ sūkṣmaḥ (rāgaḥ) so'pi, asya muneḥ sthitaprajñasya yateḥ paraṃ dṛṣṭvā paraṃ paramārthatattvaṃ brahma dṛṣṭvā 'ahameva paraṃ brahma' ityevam upalabhya (sthitasya) nivartate nirbījaṃ viṣayavijñānaṃ saṃpadyate ityarthaḥ | na asati samyagdarśane bījabhūtasya rasasya ucchedaḥ | tasmāt samyagdarśanātmikāyāḥ prajñāyāḥ sthairyaṃ saṃpādanīyam iti bhāvaḥ |