Bhagavadgita 1.1.2

1.1.2

karmajñānayorbhaktirāhityena vaiyarthyāt te dve bhaktimiśre eva sammatīkṛte| bhaktistu dvividhākevalā, pradhānībhūtā ca| tatrādyā-svata eva paramaprabalā, te dve (karmajñāne) vinaiva viśuddhaprabhāvatī, akiñcanā, ananyādi-śabdavācyā| dvitīyā tu karmajñānamiśretyakhilamagre vivṛtībhaviṣyati| athārjunasya śokamohau kathambhūtāvityapekṣāyāṃ mahābhāratavaktā śrīvaiśampāyano janmejayaṃ prati tatra bhīṣmaparvaṇi kathāmavatārayati-dhṛtarāṣṭra uvāca iti| kurukṣetre yuyutsavo yuddhārthaṃ saṅgatā māmakā duryodhanādyāḥ pāṇḍavāśca yudhiṣṭhirādayaḥ kiṃ kṛtavantastadbrūhi| nanu yuyutsava iti tvaṃ bravīṣyeva, ato yuddhameva karttumudyatāste tadapi kimakurvateti kenābhiprāyeṇa pṛcchasītyata āha-dharmakṣetra iti| 'kurukṣetraṃ devayajanam' iti śruteḥ tatkṣetrasya dharmapravarttakatvaṃ prasiddham| atastatsaṃsargamahimnā yadyadhārmikānāmapi duryodhanādīnāṃ krodhanivṛttyā dharme matiḥ syāt; pāṇḍavāstu svabhāvata eva dhārmikāḥ tato bandhuhiṃsanamanucitamityubhayeṣāmapi viveka udbhūte sandhirapi saṃbhāvyate| tataśca mamānanda eveti sañjayaṃ prati jñāpayituṃ iṣṭo bhāvo bāhyaḥ| ābhyantarastu sandhau sati pūrvavat sakaṇṭakameva rājyaṃ madātmajānāmiti me durvāra eva viṣādaḥ| tasmādasmākīno bhīṣmastvarjunena durjaya evetyato yuddhameva śreyastadeva bhūyāt iti tu tanmanorathopayogī durlakṣyaḥ|