Bhagavadgita 7.1.2

7.1.2

jñānayogayormuktisādhanatvaprasiddhirastu tatrastha-guṇībhūtabhaktiprabhāvādeva, tayā vinā tayorkiñcitkaratvasya bahuśaḥ śravaṇāt| kiñca, asyāṃ śrutau viditvā ityanantaram eva kārasyāprayogādeva| yogavyavacchedābhāve jñāpite sati, tasmādeva paramātmano viditāt kvacidaviditāpi mokṣa ityartho labhyate| tataśca bhaktyutthena nirguṇena paramātmajñānena mokṣaḥ| kvacittu bhaktyutthaṃ tajjñānaṃ vināpi kevalena bhaktimātreṇa mokṣa ityarthaḥ paryavasyati| yathā matsyaṇḍikāpiṇḍādarasanā-doṣeṇalabdhasvādādapi bhuktāt tadekanāśyo vyādhirnaśyatyevātra na sandehaḥ| “matsyaṇḍikāphāṇite khaṇḍa-vikāro śarkarāsite” ityamaraḥ śrīmaduddhavenāpyuktaṃ (śrīmadbhā. 10/47/59)-“nanvīśvaro'nubhajato'viduṣo'pi sākṣācchreyastanotyagadarāja īvopayuktaḥ” iti | mokṣadharme nārāyaṇīye'pyuktaṃ-“yā vai sādhanasampattiḥ puruṣārthacatuṣṭaye| tayā vinā tadāpnoti naro nārāyaṇāśrayaḥ” iti| ekādaśe'pyuktaṃ “yat karmābhiryattapasā jñānavairāgyataśca yat” ityādau “sarvaṃ madbhaktiyogena madbhaktolabhate'ñjasā” iti| ataeva “yannāma sakṛt śravaṇāt pukkaśo'pi vimucyate saṃsārāt” ityādau bahuśo vākyairbhaktyaiva mokṣaḥ pratipādyate iti| atha prakṛtamanusarāmaḥ,-“yogināmapi sarveṣāṃ madgatenāntarātmanā| śraddhāvān bhajate yo māṃ sa me yuktatamo mataḥ||” iti tvadvākyena tanmanaskatve sati tvajjanaviṣayakaśraddhāvatvamiti tvayā svabhakta-viśeṣalakṣaṇameva kṛtamityavagamyate| kintu sa ca kīdṛśo bhaktastvadīyajñānavijñānayoradhikārī bhavatītyapekṣāyāmāha-mayyāsakteti dvābhyām|