Nyaya Ratnamala of Parthasarathi Misra 2.3.7

2.3.7

etaduktaṃ bhavati-atra niścayaśabdena na viṣayadharmo'bhidhīyate | kiṃtu jñānaviśeṣaḥ | niścāyakastu kāraṇaguṇādiḥ| tataśca kāraṇaguṇādibhirarthatathātvarūpaprāmāṇyaniścayajñānamutpadyata iti vacanaṃ yuktameveti| kimityevaṃ vyākhyāyate svataḥ prāmāṇyaṃ nāma svato jananameva kiṃ na syādityāha-yadi punariti | vaktavyamiti | rāddhānte'pīti śeṣaḥ | anyatheti | parato jñāyeta ityukte svato jñāyata ityeva siddhānto vaktavyo nānyathetyarthaḥ | itthamekadeśimataṃ nirākṛtya svamate tannirṇayaṃ tasya granthānuguṇyaṃ cāha-prāmāṇyaṃ svata iti? | svamatena pūrvapakṣarāddhāntau pratijānāti-tadayamiti | tatra pūrvapakṣamāha-ghaṭāditi | satyesatyapi ghaṭe ghaṭajñānodayeānna ghaṭajñānaṃ ghaṭatathātvaniścāyakamityarthaḥ | tataśca paratastanniścayo'ṅgīkārya ityāha-teneti | tajjñānānantarabhāvinī tattadarthasādhyā kriyā'rthakriyā | sā cārthadivotpattumarhatīti kāryabhūtayā'rthakriyayā kāraṇabhūte'rthasya tathātve niścite paścāt pūrvajanitajñānasya prāmāṇyaniścaya ityarthaḥ | nanvarthakriyājñānasyāpyarthakriyāntarajñānāt prāmāṇyaniścaye'navasthā syādityāśaṅkya svataḥ prāmāṇyāṅgīkārānnanāvasthetyāha-arthakriyājñānaṃ tviti | pūrvajñānasya vyabhicāraśaṅkāsaṃbhavāt khalu tatprāmāṇyaniścayārthamarthakriyā-