A Cluster of Nyāya Flowers 1.12

1.12

tathā cāha bhagavān vyāsaḥna me pārthāsti kartavyaṃ triṣu lokeṣu kiñcana | nānavāptamavāptavyaṃ pravarte cātha karmaṇi || phalasya ca pravartakatvamagre pratipādayiṣyate | yadi vā saṅkalpena sampadyatāmidam ityevaṃrūpeṇa satyasaṅkalpatvād bhagavataḥ saphalo niṣpattilakṣaṇena phalena phalavān brahmastambārambho yasya | phalāntarābhisandhināpi hi pravartamānānāṃ karmasvārambhasamaye samārabhyaniṣpattereveṣyamāṇatvāt phalatvaṃ dṛṣṭam, iṣṭalakṣaṇatvāt phalasya | tathā hi kīrtyādiphalakāmā granthādi cikīrṣanto granthaniṣpattirūpāvāntaraphalaniṣpattaye namaskārādi kurvanto dṛśyante | stambaḥ sthāvarastṛṇagulmādikaḥ, tatparyantaṃ hi prāṇinaḥ karmavaśāt saṃsaranti | tathā ca sthāvarānadhikṛtyāha manuḥetadantāstu gatayo brahmādyāḥ samudāhṛtāḥ | ghore'smin bhūtasaṃsāre nityaṃ satatayāyini || iti | yadyapi cāsmin darśane sthāvarāṇāmacaitanyam, tathāpi cetanāvat sahacaritatvāt sṛṣṭau cetanāvadupacārasteṣām, 'daṇḍino gacchanti' itivat | yathā daṇḍarahitā api daṇḍisāhacaryād daṇḍina ityupacaryanta iti | saṃvidhānāmaśikṣitā iti | ṇyantācchikṣateḥ svakarmaṇi ktaḥ |