A Cluster of Nyāya Flowers 1.6

1.6

śāśvatikānandajñānaiśvaryāṇi, tāni prakṛtāni prācuryeṇa prastutāni yasya sa śāśvatikānandajñānaiśvaryamayaḥ, tādṛgātmā yasya | prācuryaṃ dvividham—satatāviyogo bāhulyañca | tadatra satatāviyogāpekṣayā mayaṭ | nityatvaṃ caiṣāmīśvarasiddhau vakṣyati | brahmaṇa ārabhya stambaparyantaścaturdaśavidho bhūtagrāmo brahmastambaḥ | saṅkalpena saphalaḥ | saha phalena svasaṃvedanalakṣaṇena vartata iti saphalaḥ | saphalo yo brahmastambastasya ya ārambhastanniṣpattyarthaśceṣṭāviśeṣaḥ | sa saphalabrahmastambhārambhaḥ | saṅkalpa evecchāviśeṣa eva saphalabrahmastambhārambho yasya | na punaricchājanitaprayatnapūrvako'smadādīnāmiva kāryaviśeṣārambho bhagavata iti stutirguṇātiśayābhidhānarūpā | vicitrasukhaduḥkhasaṃvedanasya yadyapi karmakṛtatvaṃ prāṇinām, tathāpīśvarecchānirapekṣāṇāṃ teṣāṃ na tatra sāmarthyamiti vakṣyati | tathā cāgamo'pi— "ajño janturanīśo'yam" iti |'
ārabhyate vā yenārambhaḥ prayatnaḥ, saphalabrahmastambaviṣayārambhaḥ prayatnaḥ saṅkalpa eva yasyeti | na tu saṅkalpādanyaḥ prayatnastasyāsti, yad vakṣyati īśvarasiddhau 'prayatnaścāsya saṅkalpaviśeṣa eva' iti | yat prayatnena siddhyati, tasya satyasaṅkalpatvād bhagavataḥ saṅkalpenaiva siddhiriti tato'nyasya prayatnasya kalpanā niṣpramāṇiketi vakṣyamāṇasya tātparyam |
anye vyācakṣate saṅkalpalakṣaṇena phalena saphalaḥ saprayojano brahmastambhārambho yasya | svabhāvapravṛttaṃ saṅkalpamātrameva phalaṃ prayojanaṃ pravartakaṃ jagatsarge bhagavataḥ, pūrṇakāmatyenānyasyāpekṣaṇīyasyābhāvāt |