A Cluster of Nyāya Flowers 70.p55

70.p55

vākyaṃ pakṣanivarttakaṃ pratipakṣalakṣaṇaṃ pratiṣedhaḥ, tasya pakṣeṇa pratiṣedhyena sādharmyaṃ pratijñādiyogaḥ | aviśeṣasamāyāṃ ca yaḥ samādhiruktaḥ kvaciddharmānupapatterityādi | anityatvopapatteśca tatpratiṣedho nopapadyata iti | nānityaḥ śabda ityevaṃrūpaḥ pratiṣedhaḥ | nityatāñca tadyogādasyopapādayasīti mahānayamāyuṣmato bhramaḥ | atha niradhikaraṇo dharmaḥ kathaṃ syād iti, taducyate, anityatvaṃ hi nāma nirodhaḥ pradhvaṃsābhāva ityanarthāntaram | anityatvādabhāva iti tu vyavahāramātram | sā ceyamanityatā śabdāvacchinnā na śabdādhikaraṇā | na khalu ghaṭābhāvo ghaṭāśrito bhavitumarhati, bhāvasvabhāvā hi dharmā dharmyāśritā bhavanti nābhāvaḥ | abhāvastvāśrito'pi na pratiyogyāśrito bhavati kintvarthāntaravṛttirbhūtapradeśa iva ghaṭābhāva iti | nityānityatvavirodhācca, nityatvamanityatvañcaikatra dharmiṇi virudhyate, tat kathamabhidhīyate nityamanityatvasya bhāvānnityaḥ śabda iti |