A Cluster of Nyāya Flowers 1.2.376

1.2.376

anayā diśeti . brahmavivartavādābhyupagatabrahmāparaparyāyamahāsāmānyasthānāpannameva śabdatattvamiti pūrvamevoktam . evañca śabdatattvamekameva sarvānugataṃ satyaṃ nirvikalpaviṣayaḥ . vyaktayastu mithyā evetyuktam . kathaṃ ca cākṣuṣe jñāne vāktattvamavabhāsate .. 103 .. agṛhīte tu sambandhe gṛhīte vā'pi vismṛte . aprabuddhe'pi saṃskāre vācakāvagatiḥ kutaḥ ? .. 104 .. jātyādiśabalitamapi na nirvikalpasya viṣayaḥ citratā'pi pṛthagbhūtairdharmaistatsamavāyibhiḥ . jātyādibhiryadīṣyeta dharmiṇaḥ kāmamastu sā .. 105 .. tadātmatā tu naikasya nityaṃ tattvānupagrahāt . aṃśaniṣkarṣapakṣe tu dharmabhedo balādbhavet .. 106 .. tathoktaṃ ca—vākyapadīyo 3-32 satyāsatyau tu yau bhāvau pratibhāvaṃ vyavasthitau . satyaṃ yat tatra sā jātirasatyā vyaktayaḥ smṛtāḥ . sambandhibhedātsattaiva bhidyamānā gavādiṣu . jātirityucyate tasyāṃ sarve śabdā vyavasthitāḥ . sā nityā sā mahānātmā iti . evañca brahmavivartavāde pradarśitā doṣā atrāpi samānāḥ ..