A Cluster of Nyāya Flowers 2.1.413
Nyāyamañjarī 2.1.413
- Language
- Sanskrit
2.1.413
athocyate—na vastutaḥ prādhānyamihāśrīyate, api tu śabdataḥ . śabdapramāṇakā vayam . yat śabda āha, tadevāsmākaṃ pramāṇam . tadyathā rājapuruṣaḥ iti . vastuvṛtte rājā jagatāmīśitā pradhānam, puruṣastapasvī tadicchānuvartanena jīvati . śabdastu puruṣaprādhānyamācaṣṭe, uttarapadārthapradhānatvāt tatpuruṣasyeti . evamihāpi yajeta dadyāt juhuyāt iti kriyāṃ prādhānyenopadiśati śabdaḥ . svargakāmaḥ ityapi kriyāṃ prati karturupadeśaḥ . vastuvṛttena tu karmaṇi kriyamāṇe karmasvābhāvyāta phalaṃ cedbhavati, bhavatu tat ! puruṣo'pi prīyatāṃ nāma phalena, na tu śabdaḥ phalopadeśaniṣṭha . āha ca tasmiṃstu kṛte svayameva tadbhavati śā-bhā-3-1-3 iti . svayameveti ko'rthaḥ ? na śabdaḥ phalapāratantryaṃ kriyāyāḥ pratipādayatīti ..