A Cluster of Nyāya Flowers 2.4.142
Nyāyamañjarī 2.4.142
- Language
- Sanskrit
2.4.142
tatra sukhasvabhāvaṃ sattvam, duḥkhasvabhāvaṃ rajaḥ, mohasvabhāvaṃ tamaḥ . sarvatra ca prītyaprītiviṣādadarśanāt prakāśapravṛttiniyamāvagamācca sarvaṃ triguṇātmakaṃ jagat . kāryaṃ ca yat parasparānvitarūpaṃ tadekarūpātkāraṇādutpadyamānaṃ dṛśyate . mṛdanvitāni hi ghaṭaśarāvodaṃcanaprabhṛtīni kāryasyaikasmānmṛdātmanaḥ kāraṇādudbhavanti . tadidaṃ viśvaṃ sukhaduḥkhamohānvitamiti tadātmakakāraṇakāryaṃ bhavitumarhati . yat sukhaduḥkhamohātmakaṃ kāraṇaṃ sā sattvarajastamorūpā prakṛtiḥ ..