Andhakaravada 3.p169

3.p169

tatra mūlaśakteḥ māyāyāḥ kāryabhūtam āvaraṇātmakam arthāntarameva tamaḥ iti atra mūlaśaktiḥ jagaddhetuḥ parameśvaraḥ tasya kāryabhūtaṃ tamaḥ iti tu na vaktavyam. yataḥ andhakāravādaeva svasiddhāntaṃ prātipādayatā ācāryeṇa uktam. na ca tejo abhāvasyaiva vyavadhāyakatvaṃ lāghavād aṅgīkāryam iti vācyam tathāpi viṣayasāpekṣatvāt tadākāṅkṣāyā bhāvābhāvānyatarasya tattvena vaktum aśakyatvāt tādṛśabhramaviṣayatvena viṣayatākhyapadārthāntararūpasya tamasaḥ siddheḥ apratyūhatvāt iti parameśvarasya mūlaśakteḥ kāryatve viṣayarūpatvameva tamasaḥ syāt na tu viṣayatā rūpatvam. viṣayatā tu vyāmohikayā māyayā sṛjyate. uktañca prameyaratnārṇave bālakṛṣṇena “vyāmohikā māyā jīvaṃ vyāmohya tadīyabuddhau prāpañcikasadvastusadṛśaṃ māyikaṃ padārtham utpādya puraḥsthitaviṣaye prakṣipati. tadā padārthagrahaṇe tasyāpi grahaṇāt tadviśiṣṭaṃ jñānaṃ bhramātmakaṃ bhavati”.