Bhaktimartanda p19.1

p19.1

ityantena vakṣyamāṇāṃ mukhyabhaktiṃ saparikarāṃ nirūpayituṃ cittaśuddhayarthe karmayogaṃ snehārthaṃ sāṃkhyayogamātmānātmavivekāya svarūpayogyatārthaṃ jñānaṃ ca saparikaraṃ dvitīyādibhiḥ saptabhiruktvā, navame, idaṃ tu te guhyatamaṃ pravakṣyāmyanasūyave iti pratijñāya, mahātmānastu māṃ pārtha daivīṃ prakṛtimāśritāḥ bhajantyananyamanaso jñātvā bhūtādimavyayamiti bhaktimuktvā, manmanā bhava madbhakto madyājī māṃ namaskuru māmevaiṣyasi yuktvaivamātmānaṃ matparāyaṇa ityupasaṃhṛtavān | tatra, jñānayajñena cāpyanye yajanto māmupāsate ekatvena pṛthaktvena bahudhā viśvatomukham || ye'pyanyadevatābhaktā yajante śraddhayā'nvitāḥ | te'pi māmeva kaunteya yajantyavidhipūrvakamityādinā'nyasāṅkaryasya sattvaṃ nirūpya daśame, bhūyaeva mahābāho śṛṇu me paramaṃ vaca ityupakramya sudṛḍhasnehāyātmānātmavivekasya sāṃkhyayoganirūpaṇena nirūpitatvena, na me viduḥ suragaṇāḥ prabhavaṃ na maharṣaya ityādinā'vajñādidoṣābhāvāya svamāhātmyaṃ nirūpayan, ahaṃ sarvasya prabhavo mattaḥ sarvaṃ pravarttate iti matvā bhajante māṃ budhā bhāvasamanvitāḥ || maccittā madgataprāṇā bodhayantaḥ parasparam kathayantaśca māṃ nityaṃ tuṣyanti ca ramanti ca teṣāṃ satatayuktānāṃ bhajatāṃ prītipūrvakam dadāmi buddhiyogaṃ taṃ yena māmupayānti te iti svabhajanena buddhiyogarūpaṃ svasākṣātkāramuktvā tena tamastaraṇamuktvā'rjunapṛṣṭavibhūtīrnyarūpayat |