Bhaktimartanda p19.4

p19.4

tatra pūrvādhyāyānte, tapasvibhyo'dhiko yogī jñānibhyo'pi mato'dhikaḥ karmibhyaścādhiko yogī tasmādyogī bhavārjuna || yogināmapi sarveṣāṃ madgatenāntarātmanetyaṃśaṃ mayyāsaktamanā ityanenānūdya, tena ca bhaktatvajñānaṃ sphorayitvā tadupayogi te'haṃ savijñānamityanena, jñānaṃ kathaṃ na bhavatītyākāṅkṣāyāmāha tribhirguṇamayairbhāvairebhiḥ sarvamidaṃ jagat mohitaṃ nābhijānāti māmebhyaḥ paramavyayam || daivī hyeṣā guṇamayī mama māyā duratyayeti māyayā svājñānamuktvā kathaṃ māyātaraṇaṃ, yena te jñānaṃ bhavedityākāṅkṣāyāṃ, māmeva ye prapadyante māyāmetāṃ taranti ta iti | evañca yadi prapattirjñānaṃ tadā jñānena māyātaraṇaṃ, tena ca jñānamiti vākyārtha eva viruddhayeta | bhaktyarthakatve tu vākyārthavirodhaḥ| bhaktyā māmabhijānātītismṛtiśca saṃgṛhītā| tato, na māṃ duṣkṛtino mūḍhā ityanenāsūrānnirbhartsya, caturvidhā bhajante māṃ janāḥ sukṛtino'rjuna ārtto jijñāsurarthārthī jñānī ca bharatarṣabhetyuktvā teṣāṃ madhye jñānī śreṣṭhaḥ| sa ca na śuṣkajñānaḥ| naiṣkarmyamapyacyutabhāvavarjitaṃ na śobhate jñānamalaṃ nirañjanamiti vākyāt | kintu bhaktiviśiṣṭa iti vaktuṃ— teṣāṃ jñānī nityayukta ekabhaktirviśiṣyata ityuktvā śraiṣṭhye hetumāha | priyo hi jñānino'tyarthamahaṃ sa ca mama priya iti| tarhi kimārttādibhaktānāṃ saṃsārastatrāha | udārāḥ sarva evaite jñānī tvātmaiva me matam āsthitaḥ sa hi yuktātmā māmevānuttamāṃ gatim iti | tadanantaraṃ pūrvoktabhaktaṃ stauti | bahūnāṃ janmanāmante, vāsudevaḥ sarvamiti jñānavān māṃ prapadyate isanvayaḥ |