Bhaktimartanda p19.3

p19.3

samaḥ sarveṣu bhūteṣu madbhaktiṃ labhate parāmityanena brahmajñānino bhaktikathanena jñānādbhakterutkarṣaṃ bodhayitvā, bhaktyā māmabhijānātītyanena bhaktyā svasākṣātkāramuktvā jñānamārgīyajñānaśaṅkāvāraṇāya, sarvakarmāṇyapi sadā kurvāṇo madvyapāśrayaḥ oṃ matprasādādavāpnoti śāśvataṃ padamavyayamityanena bhaktimārgīyaprasādasya kāraṇatāmuktvā punaḥ sarvaguhyatamaṃ pratijñāya, manmanā bhava madbhakto madyājī māṃ namaskuru oṃ māmevaiṣyasi satyaṃ te pratijāne priyo'si me ityanena bhaktiṃ, sarvadharmān parityajya māmekaṃ śaraṇaṃ vraja oṃ ahaṃ tvā sarvapāpebhyo mokṣayiṣyāmimā śuca ityanena prapattiṃ coktvopasañjahāra | tena gītāyā api bhaktāveva tātparyamiti niścayaḥ | nacātra prapannamityatra prapattiryā sā na bhaktirūpā, kintu jñānarūpā! gatyarthasya dhātoḥ sopasargasya jñānārthakatvāt | avagamyata ityādau tathaiva dṛṣṭatvāt | kiñca, jñānaṃ te'haṃ savijñānamidaṃ vakṣyāmyaśeṣata ityupakramya māmeva ye prapadyanta iti, bahūnāṃ janmanāmante jñānavān māṃ prapadyata iti kathanāt | te viduryukacetasa ityupasaṃhārācca prapattirjñānaṃ bhavitumarhati | ata eva tasyā ākāramāha, vāsudevaḥ sarvamiti | tathāca pūrvoktaṃ sarvaṃ viruddhamiti vācyam| gatyarthakasya sopasargasya dhātorjñānārthatvasya, nirgacchati, nigamayatītyādau vyabhicāradarśanāt | ata eva, prapadyate bhajatīti śrīdharasvāminaḥ | kiñca, jñānaṃ te'haṃ savijñānamiti nopakramaślokaḥ, kintu, mayyāsaktamanāḥ pārtha yogaṃ yuñjanmadāśrayaḥ asaṃśayaṃ samagraṃ māṃ yathā jñāsyasi tacchṛṇviti |