Bhaktimartanda p20

p20

śrīpuruṣottamaistu - saptamāṣṭamābhyāṃ saparikaraṃ jñānaṃ nirūpya tato navame, idaṃ tu te guhyatamaṃ pravakṣyāmyanasūyave iti guhyatamatvena bhaktinirūpaṇaṃ pratijñāya, rājavidyā rājaguhyamiti pañcamītatpuruṣaghaṭitapadena rājavidyā rājaguhyaṃ cetyubhayaṃ pratijñātam | anyathā, saṃnyāsayogayuktātmā vimukto māmupaiṣyasīti phalasambandhamuktvā samo'haṃ sarvabhūteṣu ityādinā bhaktiṃ vadan, māmevaiṣyasi yuktvaivamātmānaṃ matparāyaṇa iti punaḥ phaloktirvyathā syāt | rājavidyārājaguhyayoga - ityadhyāyanāma ca yujyate | tasmānmayā tatamirabhya, śubhāśubhaphalairevaṃ mokṣyase karmabandhanaiḥ saṃnyāsayogayuktātmā vimukto māmupaiṣyasi ityantena rājavidyāṃ nirūpya, samo'haṃ sarvabhūteṣu na me dveṣyo'sti na priyaḥ ye bhajanti tu māṃ bhaktyā mayi te teṣu cāpyaham || api cet sudurācāro bhajate māmananyabhāk | sādhureva sa mantavyaḥ samyagvyavasito hi saḥ || kṣipraṃ bhavati dharmātmā śaśvacchānti nigacchati | kaunteya pratijānīhi na me bhaktaḥ praṇaśyati || māṃ hi pārtha vyapāśritya ye'pi syuḥ pāpayonayaḥ | striyo vaiśyāstathā śūdrāste'pi yānti parāṃ gatim || kiṃ punarbrāhmaṇāḥ puṇyāḥ bhaktā rājarṣayastathā | anityamasukhaṃ lokamimaṃ prāpya bhajasva mām || manmanā bhava madbhakto madyājī māṃ namaskuru | māmevaiṣyasi yuktvaivamātmānaṃ matparāyaṇa ityanena guhyatamatvena bhaktiruktā | tena bhaktiśabdaguhyatamaśabdayoḥ sāmānādhikaraṇyaṃ siddhyati | aṣṭādaśe ca | sarvaguhyatamaṃ śṛṇviti pratijñāya, sarvadharmān parityajya māmekaṃ śaraṇaṃ vrajetyuktam | tatra ca guhyatamaśabdaprapattyaparaparyāyaśaraṇagamanayoḥ sāmādhikaraṇyaṃ siddhyati | tathāca yadi prapattiśabdena jñānamabhipreyāttarhi bhaktiguhyatamayoḥ sāmānādhikaraṇyamuktvā, guhyatamaprapattyaparaparyāyaśaraṇagamanayoḥ sāmānādhikaraṇyaṃ na brūyāt | tasmāt prapattirbhaktiriti niścaya ityuktam | naca dhātvarthabādhaḥ śakyaśaṅka iti vācyam | gatya'rthakadhātūnāṃ prāptyarthakatvena prāpteśca saṃbandhaviśeṣatvena sākṣādbhagavatsambandhasya prapattiśabdena sukhalabhyatvāt | sa cānyathānupapadyamāno, māmeva ye prapadyanta ityādau prakaraṇasahakāreṇa vidyāparvarūpāṃ bhaktimākṣipati|yena vinā yadanupapannamiti nyāyād bhaktiśāstroktarītyaiveti śravaṇādivanmukhyabhaktimadhyapātādbhaktiḥ | ato na lakṣaṇāpūrvasandarbhabirodhau| ata eva, nyāsoddeśīyavivaraṇe śaraṇagamanasya maryādāpuṣṭitvamuktam | tena, māmekameva śaraṇamātmānaṃ sarvadehinām yāhi sarvātmabhāvena yāsyase hyakutobhayamityatra sarvātmabhāvasyāpi śaraṇagamanātmajñānāṅgattvamiti pamphulyamānaḥ parāstaḥ | tenātra na āśaṅkāṃśa iti dik