Bhaktimartanda p24.1

p24.1

śrutīdvedo māmayaṃ prahariṣyatīti brahmāṇḍīyaprathamādhyāyasthavākyasya, vedāḥ pratiṣṭhitāḥ sarve purāṇe nātra saṃśayaḥ iti viṣṇupurāṇavākyasya, itihāsapurāṇaistu kṛto'yaṃ niścalaḥ pureti skandaprabhāsakhaṇḍīyavākyasya, nānyathā jñāyate dharmo brahmavidyā ca vaidikī tasmāddharmaḥ purāṇaṃ ca śraddhātavyaṃ manīṣibhiriti kaurmapañcadaśādhyāyasthavākyasya virodhāpatteḥ | nāpi vyāsakartṛkatvenāvedatulyatvamiti vācyam | kālenāgrahaṇaṃ dṛṣṭvā purāṇasya tato dvijāḥ vyāsarūpamahaṃ kṛtvā saṃharāmi yuge yuge iti mātsyavākyāt | nanu tathāpi purāṇatvena taulyāt kathaṃ bhāgavata eva purāṇānāmaṅgatvam| vaiparītyasyāpi vaktuṃ śakyatvāditicenna | tvayā khalu purāṇāni setihāsāni kṛtsnaśaḥ ākhyātānyapyadhītāni dharmaśāstrāṇi yānyuta || yāni vedavidāṃ śreṣṭho bhagavān bādarāyaṇiḥ | anye ca munayaḥ sūta parāvaravido viduḥ || vettha tvaṃ saumya tatsarvaṃ tattvatastadanugrahāt || tatra tatrā'ñjasā yuṣman bhavatā yadviniścitam | puṃsāmekāntataḥ śreyastannaḥ śaṃsitumarhasīti || tathā, ataḥ sādho'tra yatta sāraṃ samuddhṛtya manīṣayā brūhi naḥ śraddadhānānāṃ yenātmā suprasīdatītyātmaprasādakaikāntaḥśreyorūpapurāṇetihāsadharmaśāstrasārapraśnāva, sarvavedāntasāraṃ hi śrībhāgavatamityate iti, sarvavedetihāsānāṃ sāraṃ sāraṃ samuddhṛtamiti vākyābhyāṃ ca śrībhāgavatasya vedavedāntasarvapurāṇetihāsānāṃ sārarūpatvāt tatraiva purāṇādīnāmaṅgitvasyaikāntyāt | purāṇottaramapyaparitoṣe tannivṛttyarthaṃ nāradopadeśenāsya karaṇācca |