Bhaktimartanda p42.2

p42.2

vedāntānāṃ brahmaṇi tātparyāvadhāraṇānukūlā mānasī kriyā śravaṇamiti kaścit | tanna | gauravāt | vedāntapadavyudastasūtravedapurāṇetihāsaśravaṇe'vyāptiśca | yuktibhiścintanaṃ mananam | tacca smaraṇameva | kaścittu mananaṃ śabdāvadhārite'rthe mānāntaravirodhaśaṅkāyāṃ tannirākaraṇānukūlākasmikajñānajanako vyāpāra ityāha | tadapi na | gauravāt | nirantaraṃ dīrghakālamanucintanaṃ nididhyāsanam | mananānantarabhāvitvādanviti | kaścitt anādidurvāsanayā viṣayākṛṣyamāṇa bāhyacittasya viṣayebhya upakṛṣyātmāviṣayakasthairyānukūlo vyāpāro nididhyāsanamityāha | tadapi tata eva nirasanīyam || upulakṣaṇaṃ caitannavadhābhakteḥ | śravaṇaṃ kīrttanaṃ viṣṇoḥ smaraṇaṃ pādasevanam arcanaṃ vandanaṃ dāsyaṃ sakhyamātmanivedanamiti vākyaikavākyatāyai | tathā, tasmādbhārata sarvātmā bhagavān harirīśvaraḥ ✻ śrotavyaḥ kīrttayitavyaśca smarttavyaścecchatā'bhayamityatrāpyupalakṣaṇavidhayā navānāṃ grahaṇaṃ bodhyam | taduktamācāryaiḥ | bhāgavataśāstrasya bhaktiphalakatvād vaktuḥ śukasya brahmajñatvācca na dharmarūpaṃ śravaṇādikaṃ, kintu bhaktirūpam | tathāca navavidhā bhaktirvaktavyā, kutastrayāṇāmuktirityāśaṅkāyāṃ navavidhabhaktervaktavyatve'pi premānantarabhāvitvādanyeṣāṃ, trayamevoktam | tribhiḥ snehe jāte'nyeṣāṃ karttavyatānuktasiddhaiveti | etenātmāvā're draṣṭavya iti śrutāvapyanuktasiddhānāmitareṣāmupalakṣaṇavidhayā grahaṇaṃ sūcitam| iyān viśeṣaḥ| manananididhyāsanayordvitīyasubodhinyāṃ śravaṇāṅgatvena pratipādanācchrutau ekavidhānam | smṛtau tu trayaṃ vihitamiti |