Bhaktimartanda p42.3

p42.3

tathā śrutau draṣṭavya ityanena jñānamuktam | tadapi premṇā kṛtestribhiḥ smṛtyuktaiḥ śravaṇādibhiḥ sambhavati | kecittu nididhyāsanaṃ mukhyaṃ kāraṇaṃ, tadaṅgaṃ mananaṃ, mananāṅgaṃ śravaṇamāhuḥ | aparetu, śravaṇaṃ pradhānaṃ manananididhyāsanayoḥ śravaṇāt parācīnayorapi śravaṇaphalabrahmadarśananirvarttakatayā ārādupakārakāṅgatvamāhuḥ| tatra nādyaḥ| bhaktītarāgrāhyatvāt puruṣottamasya | dvitīyastu nātivirodhīti na dūṣyate| tena trayāṇāṃ śrutismṛtivākyānāmekavākyatā siddhā | evamanyatrā'pyūhyam | nanu ātmā śrotavya iti ko'rthaḥ | tadvācakaśabdānāṃ śrotreṇa grahaṇamuta teṣāmartho jñātavyaḥ, abhiprāyo vā| tatrāpi sarveṣāṃ śabdānāṃ jñātavyaḥ, keṣāñcideva vā| nādyaḥ| trividhavaiyarthyaprasaṅgāt| tathāhi | grahaṇasya pramāṇavastuparatantratvena śrotrendriyavato yataḥkutaścicchabde uccārite tadgrahaṇaṃ bhaviṣyati, evaṃ gṛhītasadbhāvasya tu punaḥ arthajñānamapi bhaviṣyati, na tu tatsampādane phalopayoga iti| adṛṣṭavaśād yatnaṃ vināpi sarveṣāṃ tatsambhavāt | atha sarvadā kartavyam | aśaktyā'sambhavājjīvanānupapattiśca | anyacca, bhagavadvācakadedavākyānām ekenopasthāpayitum aśakyatvād yatkiñcitpadavākyānāṃ sarveṣāṃ sattvādvaktavyam