Bhaktimartanda p49.1

p49.1

sya na virodhaḥ | idamupalakṣaṇa- gurūpasattyanugrahātmanivedanapāpābhāvabhagavadbhaktapūjāśaṅkhādidhāraṇādīnām | gurūpasatteḥ kāraṇatvaṃ, madbhaktaṃ guruṃ śāntamupāsīta madātmakamiti vākyāt | anugrahasyāpi mukhyakāraṇatvaṃ, nāyamātmā pravacanena labhya iti, dhātuḥ prasādānmahimānamīśamityādiśruteḥ | bhagavān bhajatāṃ mukundo muktiṃ dadāti karhicit sma na bhaktiyogamiti smṛteśca | evaṃ dharmairmanuṣyāṇāmuddhavātmanivedinām mayi saṃjāyate bhaktiḥ ko'nyo'rtho'syāvaśiṣyata iti smṛterātmanivedanasya | tathā, janmāntarasahasreṣu tapodhyānasamādhibhiḥ narāṇāṃ kṣīṇapāpānāṃ kṛṣṇe bhaktiḥ prajāyata iti smṛteḥ pāpābhāvasya | madīyavratadhāraṇamiti smṛtervratakaraṇasya, madbhaktapūjābhyadhiketi vākyādbhaktapūjāyāḥ | mṛdā śaṅkhacakrādikamabhidhāryam | śaṅkhādicihnarahitaḥ pūjāṃ yastu samācaret niṣphalaṃ pūjanaṃ tasya hariścāpi na tuṣyatīti vākyāt | vahnineva tu saṃyuktaṃ cakramādāya vaiṣṇavaḥ dhārayet sarvavarṇānāṃ harisālokyakāmyayeti vākyāt taptamudrādhāraṇaṃ vā | śaṅkhacakraṃ mṛdā yastu kuryāttaptāyasena vā sa śūdravad bahiṣkāryaḥ sarvasmād dvijakarmaṇa iti niṣedhastu smṛtau pūjānullekhāttadrahita eva saṃkrāmati | mṛdā niṣedhamupakramya taptāyase paryavasānācca | kiñca, brāhmaṇasya niṣiddhaṃ vaiṣṇave ca vihitam | etacca pūrvāt parabalīyastvanyāyena brāhmaṇaścedvaiṣṇavastadā vaiṣṇavadharmānusaraṇaṃ karttavyam | adhikaṃ tu śaṅkhādidhāraṇavādādūhyam || syādetat |