Advaitamoda 4.8-2.2

4.8-2.2

pūrvasaṃskārāṇāmavinaṣṭatvātsadyaḥ pariṇāmonmukhaṃ tajjñānasāmānyaṃ garbhasthaṃ sthūlaśarīramiva vartate | jīvanmuktadaśāyāṃ tu pūrvasaṃskārāṇāṃ vinaṣṭaprāyatvādakhilapariṇāmatyāgonmukham | yathā''sannamṛtyoḥ sthūlaśarīramakhilabhogasādhanībhūtapariṇāmatyāgonmukhaṃ bhavati tadvat | jīvanmuktyavasthāyāṃ yattrakcandanavanitādiviṣayadarśanaṃ na tatkāryarūpeṇa kiṃtu kāraṇībhūtāvidyāśaktimadbrahmarūpeṇa | ato na tatkāryasaṃbaddhaṃ saṃskāraṃ janayituṃ prabhavati | nāpi tādṛśapūrvasaṃskārodbodhakaṃ bhavati | ataḥ pūrvasaṃskārāstadānīṃ kṣayonmukhā vinaṣṭaprāyā bhavanti | kāraṇavyatirekeṇa kāryasyāsattvānna
viṣayānkāryarūpeṇa paśyati jñānī | baddhajīvastu kāryarūpeṇa paśyati
tatra sarvatrānirvacanīyakhyātireva | kāryasya sadgrūpeṇāsadrūpeṇa ca nirvaktumaśakyatvāt | yathā śuktau bhāsamānaṃ rajatam | taddhi na sat | nedaṃ rajatamiti bādhānupapatteḥ | nāpyasat | idaṃ rajatamiti pratītyanupapatteḥ | ato'nirvacanīyamucyate
yadā śuktiridaṃtvena jñāyate na tu śuktitvena tadā tādṛśaṃ mūlāvidyākāryabhūtaṃ
śuktyajñānamidaṃtayā jāyamānajñānasahakṛtaṃ cākacakyyādisamudbodhitarajatasaṃskārasahakṛtaṃ ca rajatākāreṇa pariṇamate | tadvadevedaṃ sarvaṃ jaganna sat | jñānidṛṣṭyā
bādhānupapatteḥ | “neha nānāsti kiṃcana” (bṛ0
4|4|19) ityādiśrutivirodhācca | nāpyasat | pratītyanupapatteḥ | ato'nirvacanīyameva
tacca vikṣepaśaktimatyā mūlāvidyāyā mahattattvāhaṃkārākāśādidvārā kāryabhūtam
āvaraṇaśaktimatyā mūlāvidyāyāḥ kāryaṃ ca lokaprasiddhaṃ śuktyajñānādi | tathā