Shribhashya 6.2-55
Śrībhāṣya (complete text) 6.2-55
- Language
- Sanskrit
6.2-55
27
lakṣaṇyasādhanamiti ca hāsyam, niranvayavināśināṃ jñānānāmanuvarttamānasthirākāravirahādvāsanā ca durupapādā | vinaṣṭenapūrvajñānenānutpannamuttarajñānaṃ kathaṃ vāsyate | ato jñānavaicitryamapyarthavaicitryakṛtameva | tattadarthavyavahāra-yogyatāpādanarūpatayā sākṣātpratīyamānasya jñānasya tattadarthasambandhāyattaṃ tattadasādhāraṇyam | sambandhaśca saṃyoga-lakṣaṇaḥ | jñānamapi hi dravyameva | prabhādravyasya pradīpaguṇabhūtasyeva jñānasyāpyātmaguṇabhūtasya dravyatvamaviruddha-mityuktam | ato na vāhyāthartābhāvaḥ || 27 ||