Aphorisms on Brahman 24.69

24.69

sa bhagavānmahādevo'vāptasamastakāmassarvajñassarveśvarassatyasaṃkalpaḥ
svamāhātmyānuguṇalīlāpravṛttaḥ etāni karmāṇi samīcīnānyetānyasamīcīnānīti
karmadvaividhyaṃ saṃvidhāya tadupāsanocitadehendriyādikaṃ tanniyamanaśaktiṃ ca
sarveṣāṃ kṣetrajñānāṃ sāmānyataḥ pradiśya svaśāsanāvabodhiśāstraṃ pradarśya
tadupasaṃhārārthaṃ cāntarātmatayānupraviśyānumantṛtayā ca niyacchaṃstiṣṭhati |
kṣetrajñāstu tadāhitaśaktayaḥ tatpradiṣṭakāraṇakalevarādikāstadādhārāśca svayameva
svecchānuguṇyena puṇyāpuṇyarūpe karmaṇī upādadāte | tataśca
puṇyarūpakarmakāriṇaṃ svaśāsanānuvartitaṃ jñātvā
dharmārthakāmamokṣairvardhayate śāsanātivatinaṃ ca tadviparyayairyojayati |
atassvātantryādivaikalpacodyāni nāvakāśaṃ labhante |