Nyayavinishcaya v1.p25.2

v1.p25.2

anādi se jīva aura pula kā aisā saṃyoga hai jo paryāyāntara lene para bhī jīva isake saṃyoga se mukta nahīṃ ho pātā aura usameṃ vibhāva pariṇamana-rāga dveṣa moha ajñānarūpa daśāem̐ hotī rahatī haiṃ| jaba yaha jīva apanī cāritrasādhanā dvārā itanā samartha aura svarūpapratiṣṭha ho jātā hai ki usa para bāhya jagat kā koī bhī prabhāva na par̤a sake to vaha mukta ho jātā hai aura apane ananta caitanya meṃ sthira ho jātā hai| yaha mukta jīva apane pratikṣaṇa parivartita svābhāvika caitanya meṃ līna rahatā hai phira usameṃ aśuddha daśā nahīṃ hotī| antataḥ pudraka paramāṇu hī aise haiṃ jinameṃ śuddha yā aśuddha kisī bhī daśā meṃ dūsare saṃyoga ke ādhāra se nānā ākṛtiyām̐ aura aneka pariṇamana saṃbhava haiṃ tathā hote rahate haiṃ | isa jagat vyavasthā meṃ kisī eka īśvara jaise niyantā kā koī sthāna nahīṃ hai; yaha to apane apane saṃyoga-viyogoṃ se pariṇamanaśīla hai | pratyeka padārtha kā apanā sahaja svabhāvajanya pratikṣaṇabhāvī pariṇamanacakra cālū hai | yadi koī dūsarā saṃyoga ā par̤ā aura usa dravya ne isake prabhāva ko ātmasāt kiyā to pariṇamana tatprabhāvita ho jāyagā, anyathā vaha apanī gatise badalatā calā jāyagā | hāiḍrojana kā eka aṇu apanī gati se pratikṣaṇa hāiḍrojana rūpa meṃ badala rahā hai| yadi āksījana kā aṇu usameṃ ā juṭā to donoṃ kā jalarūpa pariṇamana ho jāyagā| ve eka bindu rūpa se sadṛśa saṃyukta pariṇamana kara leṃge| yadi kisī vaijñānika ke viśleṣaṇaprayoga kā nimitta milā to ve donoṃ phira judā judā bhī ho sakate haiṃ|