Deviṃdatthaa (Āgamasuttāṇi, ed. Dīparatnasāgara 2012)

Muni Dīparatnasāgara's text of the Āgama (Āgamasuttāṇi, after the Āgamamañjūṣā of Āgamoddhāraka Sāgarānandasūri), sūtra by sūtra with the edition's running numbers.

Language: Ardhamāgadhī Prakrit
Date: 100–500 CE
Extent: 308 passages, 3,275 words
Text: complete digital text
Source: jainelibrary-agam · Agam 32 Devindatthao Navamam Painnayam Mulam PDF File, by Dipratnasagar, Deepratnasagar, Deepratnasagar 2012… · Shown with the permission of Muni Dīparatnasāgara and the Jain eLibrary (granted 2026-10-18), text unaltered;…

1 Maṅgalaṃ, devendrapṛcchā — 11 parts
2 Bhavanapati adhikāra — 55 parts
3 Vāṇavyantara adhikāra — 14 parts
4 Jyotiṣka adhikāra — 81 parts
5 Vaimānika adhikāra — 112 parts
6 Isiprabhāpṛthvi evaṃ siddhādhikāra — 35 parts

Text

Maṅgalaṃ, devendrapṛcchā

1.1

amara-naravaṃdie vaṃdiūṇa usabhāie jinavariṃde |
vīravarapacchimaṃte telokkagurū guṇāinne ||

1.2

koi paḍhame paosammi sāvao samayanicchayavihiṇṇū |
vannei thayamuyāraṃ jiyamāṇe vaddhamānammi ||

1.3

tassa thuṇaṃtassa jinaṃ sāmaiyakaḍā piyā suhanisannā |
paṃjaliuḍā abhimuhī suṇai thayaṃ vaddhamānassa ||

1.4

iṃdavilayāhiṃ tilayarayaṇaṃkie lakkhaṇaṃkie sirasā |
pāe avagayamāṇassa vaṃdimo vaddhamānassa ||

1.5

vinayapaṇaehi siḍhilamauḍehiṃ apaḍimajasassa devehiṃ |
pāyā pasaṃtarosassa vaṃdiyā vaddhamānassa ||

1.6

battīsaṃ deviṃdā jassa guṇehiṃ uvahammiyā bāḍhaṃ |
to tassa ciya ccheyaṃ pāyacchāyaṃ uvehāmo ||

1.7

‘battīsaṃ deviṃda’tti bhaṇiyamittammi sā piyaṃ bhaṇai |
aṃtarabhāsaṃ tāhe kāhāmī kouhalleṇaṃ ||

1.8

kayare te battīsaṃ deviṃdā? ko va kattha parivasai? |
kevaiyā kassa ṭhiī? ko bhavanapariggaho kassa? ||

1.9

kevaiyā va vimānā? bhavanā? nagarā va huṃti kevaiyā? |
puḍhavīṇa va bāhallaṃ? uccatta? vimānavanno vā? ||

1.10

ke kenā''hāraṃti va kāleṇukkosa majjhima jahannaṃ? |
ussāso nissāso ohīvisao va ko kesiṃ? ||

1.11

vinaovayārauvahammiyāi hāsarasamuvvahaṃtīe |
paḍipucchio piyāe bhaṇai, suyanu! taṃ nisāmeha ||

Bhavanapati adhikāra

2.12

suyanāṇasāgarāo suṇiuṃ paḍipucchaṇāi jaṃ laddhaṃ |
suṇa vāgaraṇāvaliyaṃ nāmāvaliyāi iṃdāṇaṃ ||

2.13

suṇa vāgaraṇāvaliyaṃ rayaṇaṃ va paṇāmiyaṃ ca vīrehiṃ |
tārāvali vva dhavalaṃ hiyaeṇa pasannacitteṇaṃ ||

2.14

rayaṇappabhāpuḍhavīnikuḍavāsī sutaṇu! teulesāgā |
vīsaṃ vikasiyanayaṇā bhavanavaī me nisāmeha ||

2.15

do bhavanavaīiṃdā camare 1 vairoyaṇe 2 ya asurāṇaṃ 1 |
do nāgakumāriṃdā dharaṇe 3 taha bhūyānaṃde 4 ya 2 ||

2.16

do suyanu! suvaṇṇiṃdā veṇūdeve 5 ya veṇudālī 6 ya 3 |
do dīvakumāriṃdā puṇṇe 7 ya tahā vasiṭṭhe 8 ya 4 ||

2.17

do udahikumāriṃdā jalakaṃte 9 jalapabhe 10 ya nāmeṇaṃ 5 |
amiyagai 11 amiyavāhaṇa 12 disākumārāṇa do iṃdā 6 ||

2.18

do vāukumāriṃdā velaṃba 13 pabhaṃjaṇe 14 ya nāmeṇaṃ 7 |
do thaṇiyakumāriṃdā ghose 15 ya tahā mahāghose 16 | 8 ||

2.19

do vijjukumāriṃdā harikaṃta 17 harissahe 18 ya nāmeṇaṃ 9 |
aggisiha 19 aggimānava 20 huyāsaṇavaī vi do iṃdā 10 ||

2.20

ee viyasiyanayane! vīsaṃ viyasiyajasā mae kahiyā |
bhavanavarasuhanisanne, suṇa bhavanapariggahamimesiṃ ||

2.21

camara-vairoyaṇāṇaṃ asuriṃdāṇaṃ mahānubhāgāṇaṃ |
tesiṃ bhavanavarāṇaṃ causaṭṭhimahe sayasahassā ||

2.22

nāgakumāriṃdāṇaṃ bhūyānaṃda-dharanāṇa doṇhaṃ pi |
tesiṃ bhavanavarāṇaṃ culasīimahe sayasahassā ||

2.23

do suyanu! suvaṇṇiṃdā veṇūdeve ya veṇudālī ya |
tesiṃ bhavanavarāṇaṃ bāvattari mo sayasahassā ||

2.24

vāukumāriṃdāṇaṃ velaṃba-pabhaṃjanāṇa doṇhaṃ pi |
tesiṃ bhavanavarāṇaṃ channavaimahe sayasahassā ||

2.25

covaṭṭhī asurāṇaṃ, culasīī ceva hoi nāgāṇaṃ |
bāvattarī suvaṇṇāṇa, vāukumārāṇa channauī ||

2.26

dīva-disā-udahīṇaṃ vijjukumāriṃda-thaṇiya-maggīṇaṃ |
chaṇhaṃ pi juvalayāṇaṃ chāvattari mo sayasahassā ||

2.27

ekkekkammi ya juyale niyamā chāvattariṃ sayasahassā |
suṃdari! līlāe ṭhie! ṭhiīvisesaṃ nisāmehi ||

2.28

camarassa sāgarovama suṃdari! ukkosiyā ṭhiī bhaṇiyā |
sāhīyā boddhavvā balissa vairoyaṇiṃdassa ||

2.29

je dāhiṇāṇa iṃdā camaraṃ mottūṇa sesayā bhaṇiyā |
paliovamaṃ divaḍḍhaṃ ṭhiī u ukkosiyā tesiṃ ||

2.30

je uttareṇa iṃdā baliṃ pamottūṇa sesayā bhaṇiyā |
paliovamāiṃ donni u desūṇāiṃ ṭhiī tesiṃ ||

2.31

eso vi ṭhiiviseso suṃdararūve! visiṭṭharūvāṇaṃ |
bhomijjasuravarāṇaṃ suṇa anubhāge sunayarāṇaṃ ||

2.32

joyaṇasahassamegaṃ ogāhittūṇa bhavana-nagarāiṃ |
rayaṇappabhāi savve ekkārasa joyaṇasahasse ||

2.33

aṃto cauraṃsā khalu, ahiyamanoharasahāvaramaṇijjā |
bāhirao ciya vaṭṭā, nimmalavairāmayā savve ||

2.34

ukkinnaṃtaraphalihā abbhiṃtarao u bhavanavāsīṇaṃ |
bhavana-nagarā virāyaṃti kanagasusiliṭṭhapāgārā ||

2.35

varapaumakaṇṇiyāsaṃṭhiehiṃ hiṭṭhā sahāvalaṭṭhehiṃ |
sohiṃti paiṭṭhāṇehiṃ vivihamaṇibhatticittehiṃ ||

2.36

caṃdaṇapayaṭṭhiehi ya āsattosattamalla-dāmehiṃ |
dārehiṃ puravarā te paḍāgamālāulā rammā ||

2.37

aṭṭheva joyaṇāiṃ uvviddhā hoṃti te duvāravarā |
dhūmaghaḍiyāulāiṃ kaṃcanaghaṃṭāpiṇaddhāṇi ||

2.38

jahiṃ devā bhavanavaī varataruṇīgīya-vāiyaraveṇaṃ |
niccasuhiyā pamuiyā gayaṃ pi kālaṃ na yāṇaṃti ||

2.39

camare dharaṇe taha veṇudeva puṇṇe ya hoi jalakaṃte |
amiyagaī velaṃbe ghose ya harī ya aggisihe ||

2.40

kanaga-maṇi-rayaṇathūbhiyarammāiṃ saveiyāiṃ bhavanāiṃ |
eesiṃ dāhiṇao, sesāṇaṃ uttare pāse ||

2.41

cautīsā coyālā aṭṭhattīsaṃ ca sayasahassāiṃ |
cattā pannāsā khalu dāhiṇao huṃti bhavanāiṃ ||

2.42

tīsā cattālīsā cautīsaṃ ceva sayasahassāiṃ |
chattīsā chāyālā uttarao huṃti bhavanāiṃ ||

2.43

bhavana-vimānavaīṇaṃ tāyattīsā ya logapālā ya |
savvesi tinni parisā, sāmāṇa caugguṇā''yarakkhā u ||

2.44

causaṭṭhī saṭṭhī khalu chacca sahassā taheva cattāri |
bhavanavai-vāṇamaṃtara-joisiyāṇaṃ ca sāmāṇā ||

2.45

paṃca'ggamahīsīo camara-balīṇaṃ havaṃti nāyavvā |
sesayabhavaniṃdāṇaṃ chacceva ya aggamahisīo ||

2.46

do ceva jaṃbudīve, cattāri ya mānusuttare sele |
cha ccā'ruṇe samudde, aṭṭha ya aruṇammi dīvammi ||

2.47

jannāmae samudde dīve vā jammi hoṃti āvāsā |
tannāmae samudde dīve vā tesi uppāyā ||

2.48

asurāṇaṃ nāgāṇaṃ udahikumārāṇa huṃti āvāsā |
aruṇavarammi samudde tattheva ya tesi uppāyā ||

2.49

dīva-disā-aggīṇaṃ thaṇiyakumārāṇa hoṃti āvāsā |
aruṇavare dīvammi ya, tattheva ya tesi uppāyā ||

2.50

vāu-suvaṇṇiṃdāṇaṃ eesiṃ mānusuttare sele |
hariṇo harissahassa ya vijjuppabha-mālavaṃtesu ||

2.51

eesiṃ devāṇaṃ bala-viriya-parakkamo u jo jassa |
te suṃdari! vaṇṇe haṃ jahakkamaṃ ānupuvvīe ||

2.52

jāva ya jaṃbuddīvo jāva ya camarassa camaracaṃcā u |
asurehiṃ asurakannāhiṃ atthi visao bharetuṃ je ||

2.53

taṃ ceva samairegaṃ balissa vairoyaṇassa boddhavvaṃ |
asurehiṃ asurakannāhiṃ tassa visao bhareuṃ je ||

2.54

dharaṇo vi nāgarāyā jaṃbuddīvaṃ phaḍāi chāijjā |
taṃ ceva samairegaṃ bhūyānaṃde vi boddhavvaṃ ||

2.55

garuliṃda veṇudevo jaṃbuddīvaṃ chaejja pakkheṇaṃ |
taṃ ceva samairegaṃ veṇūdālimmi boddhavvaṃ ||

2.56

puṇṇo vi jaṃbudīvaṃ pāṇitaleṇaṃ chaejja ekkeṇaṃ |
taṃ ceva samairegaṃ havai vasiṭṭhe vi boddhavvaṃ ||

2.57

ekkāe jalummīe jaṃbuddīvaṃ bharejja jalakaṃto |
taṃ ceva samairegaṃ jalappabhe hoi boddhavvaṃ ||

2.58

amiyagaissa vi visao jaṃbuddīvaṃ tu pāyapaṇhīe |
kaṃpejja niravasesaṃ, iyaro puṇa taṃ samairegaṃ ||

2.59

ekkāe vāyaguṃjāe jaṃbudīvaṃ bharejja velaṃbo |
taṃ ceva samairegaṃ pabhaṃjane hoi boddhavvaṃ ||

2.60

ghoso vi jaṃbudīvaṃ suṃdari! ekkeṇa thaṇiyasaddeṇaṃ |
bahirīkarijja savvaṃ, iyaro puṇa taṃ samairegaṃ ||

2.61

ekkāe vijjuyāe jaṃbuddīvaṃ harī payāsejjā |
taṃ ceva samairegaṃ harissahe hoi boddhavvaṃ ||

2.62

ekkāe aggijālāe jaṃbudīvaṃ ḍahejja aggisiho |
taṃ ceva samairegaṃ mānavae hoi boddhavvaṃ ||

2.63

tiriyaṃ tu asaṃkhejjā dīva-samuddā saehiṃ rūvehiṃ |
avagāḍhā u karijjā suṃdari! eesi egayaro ||

2.64

pabhū annayaro iṃdo jaṃbuddīvaṃ tu vāmahattheṇaṃ |
chattaṃ jahā dharejjā ayattao maṃdaraṃ ghittuṃ ||

2.65

jaṃbuddīvaṃ kāūṇa chattayaṃ, maṃdaraṃ ca se daṃḍaṃ |
pabhū annayaro iṃdo, eso tesiṃ balaviseso ||

2.66

esā bhavanavaīṇaṃ bhavanaṭhiī vanniyā samāseṇaṃ |
suṇa vāṇamaṃtarāṇaṃ bhavanaṭhiī ānupuvvīe ||

Vāṇavyantara adhikāra

3.67

pisāya 1 bhūyā 2 jakkhā 3 ya rakkhasā 4 kinnarā 5 ya kiṃpurisā 6 |
mahoragā 7 ya gaṃdhavvā 8 aṭṭhavihā vāṇamaṃtariyā ||

3.68

ete u samāseṇaṃ kahiyā bhe vāṇamaṃtarā devā |
patteyaṃ pi ya vocchaṃ solasa iṃde mahiḍḍhīe ||

3.69

kāle 1 ya mahākāle 2|1 surūva 3 paḍirūva 4|2 punnabhadde 5 ya |
amaravai māṇibhadde 6|3 bhīme 7 ya tahā mahābhīme 8|4 ||

3.70

kinnara 9 kiṃpurise 10 khalu 5 sappurise 11 ceva taha mahāpurise 12|6 |
aikāya 13 mahākāe 14|7 gīyaraī 15 ceva gīyajase 16|8 ||

3.71

sannihie 1 sāmāṇe 2|1 dhāya 3 vidhāe 4|2 isī 5 ya isivāle 6|3 |
issara 7 mahissare yā 8|4 havai suvacche 9 visāle ya 10|5 ||

3.72

hāse 11 hāsaraī vi ya 12|6 see ya 13 tahā bhave mahāsee 14|7 |
payae 15 payayavaī vi ya 16|8 neyavvā ānupuvvīe ||

3.73

uḍḍhamahe tiriyammi ya vasahiṃ uvaveṃti vaṃtarā devā |
bhavanā puṇa'ṇha rayaṇappabhāe uvarillae kaṃḍe ||

3.74

ekkekkammi ya juyale niyamā bhavanā varā asaṃkhejjā |
saṃkhijjavitthaḍā puṇa, navaraṃ eta'ttha nāṇattaṃ ||

3.75

jaṃbuddīvasamā khalu ukkoseṇaṃ bhavaṃti bhavanavarā |
khuḍḍā khettasamā vi ya videhasamayā ya majjhimayā ||

3.76

jahiṃ devā vaṃtariyā varataruṇīgīya-vāiyaraveṇaṃ |
niccasuhiyā pamuiyā gayaṃ pi kālaṃ na yāṇaṃti ||

3.77

kāle surūva puṇṇe bhīme taha kinnare ya sappurise |
aikāe gīyaraī aṭṭhete hoṃti dāhiṇao ||

3.78

maṇi-kanaga-rayaṇathūbhiya jaṃbūnayaveiyāiṃ bhavanāiṃ |
eesiṃ dāhiṇao, sesāṇaṃ uttare pāse ||

3.79

dasavāsasahassāiṃ ṭhiī jahannā u vaṃtarasurāṇaṃ |
paliovamaṃ tu ekkaṃ ṭhiī u ukkosiyā tesiṃ ||

3.80

esā vaṃtariyāṇaṃ bhavanaṭhiī vanniyā samāseṇaṃ |
suṇa joisālayāṇaṃ āvāsavihiṃ suravarāṇaṃ ||

Jyotiṣka adhikāra

4.81

caṃdā 1 sūrā 2 tārāgaṇā 3 ya nakkhatta 4 gahagaṇasamaggā 5 |
paṃcavihā joisiyā, ṭhiī viyārī ya te bhaṇiyā ||

4.82

addhakaviṭṭhagasaṃṭhāṇasaṃṭhiyā phāliyāmayā rammā |
joisiyāṇa vimānā tiriyaṃloe asaṃkhejjā ||

4.83

dharaṇiyalāo samāo sattahiṃ nauehiṃ joyaṇasaehiṃ |
heṭṭhillo hoi talo, sūro puṇa aṭṭhahiṃ saehiṃ ||

4.84

aṭṭhasae āsīe caṃdo taha ceva hoi uvaritale |
egaṃ dasuttarasayaṃ bāhallaṃ joisassa bhave ||

4.85

egaṭṭhibhāga kāūṇa joyaṇaṃ tassa bhāgachappannaṃ |
caṃdaparimaṃḍalaṃ khalu, aḍayālīsā ya sūrassa ||

4.86

jahiṃ devā joisiyā varataruṇīgīya-vāiyaraveṇaṃ |
niccasuhiyā pamuiyā gayaṃ pi kālaṃ na yāṇaṃti ||

4.87

chappannaṃ khalu bhāgā vicchinnaṃ caṃdamaṃḍalaṃ hoi |
aḍavīsaṃ ca kalāo bāhallaṃ tassa boddhavvaṃ ||

4.88

aḍayālīsaṃ bhāgā vicchinnaṃ sūramaṃḍalaṃ hoi |
cauvīsaṃ ca kalāo bāhallaṃ tassa boddhavvaṃ ||

4.89

addhajoyaṇiyā u gahā, tassa'ddhaṃ ceva hoi nakkhattā |
nakkhattaddhe tārā, tassa'ddhaṃ ceva bāhallaṃ ||

4.90

joyaṇamaddhaṃ tatto ya gāuyaṃ paṃca dhaṇusayā hoṃti |
gaha-nakkhattagaṇāṇaṃ tāravimānāṇa vikkhaṃbho ||

4.91

jo jassa u vikkhaṃbho, tassa'ddhaṃ ceva hoi bāhallaṃ |
taṃ tiguṇaṃ savisesaṃ tu parirao hoi boddhavvo ||

4.92

solasa ceva sahassā aṭṭha ya cauro ya donni ya sahassā |
joisiyāṇa vimānā vahaṃti devā'bhiogā u ||

4.93

purao vahaṃti sīhā, dāhiṇao kuṃjarā mahākāyā |
paccatthimeṇa vasahā, turagā puna uttare pāse ||

4.94

caṃdehi u sigghayarā sūrā, sūrehiṃ taha gahā sigghā |
nakkhattā u gahehi ya, nakkhattehiṃ tu tārāo ||

4.95

savva'ppagaī caṃdā, tārā puna hoṃti savvasigghagaī |
eso gaīviseso joisiyāṇaṃ tu devāṇaṃ ||

4.96

appiḍḍhiyā u tārā, nakkhattā khalu tao mahiḍḍhie |
nakkhattehiṃ tu gahā, gahehiṃ sūrā, tao caṃdā ||

4.97

savvabbhiṃtara'bhīī, mūlo puna savvabāhiro hoi |
savvovariṃ ca sāī, bharaṇī puna savvahiṭṭhimayā ||

4.98

savve gaha-nakkhattā majjhe khalu hoṃti caṃda-sūrāṇaṃ |
hiṭṭhā samaṃ ca uppiṃ tārāo caṃda-sūrāṇaṃ ||

4.99

paṃceva dhanusayāiṃ jahannayaṃ aṃtaraṃ tu tārāṇaṃ |
do ceva gāuyāiṃ nivvāghāeṇa ukkosaṃ ||

4.100

donni sae chāvaṭṭhe jahannayaṃ aṃtaraṃ tu tārāṇaṃ |
bārasa ceva sahassā do bāyālā ya ukkosā ||

4.101

eyassa caṃdajogo sattaṭṭhiṃ khaṃḍio ahoratto |
te huṃti nava muhuttā sattāvīsaṃ kalāo ya ||

4.102

sayabhisayā bharaṇīo addā assesa sāi jeṭṭhā ya |
ee cha nnakkhattā pannarasamuhuttasaṃjogā ||

4.103

tinneva uttarāiṃ puṇavvasū rohiṇī visāhā ya |
ee cha nnakkhattā paṇayālamuhuttasaṃjogā ||

4.104

avasesā nakkhattā panarasa yā hoṃti tīsaimuhuttā |
caṃdammi esa jogo nakkhattāṇaṃ muṇeyavvo ||

4.105

abhiī chacca muhutte cattāri ya kevale ahoratte |
sūreṇa samaṃ vaccai etto sesāṇa vucchāmi ||

4.106

sayabhisayā bharaṇīo addā assesa sāi jeṭṭhā ya |
vaccaṃti cha'horatte ekkāvīsaṃ muhutte ya ||

4.107

tinneva uttarāiṃ punavvasū rohiṇī visāhā ya |
vaccaṃti muhutte tinni ceva vīsaṃ ahoratte ||

4.108

avasesā nakkhattā pannarasa vi sūrasahagayā jaṃti |
bārasa ceva muhutte terasa ya same ahoratte ||

4.109

do caṃdā, do sūrā, nakkhattā khalu havaṃti chappannā |
chāvattaraṃ gahasayaṃ jaṃbuddīve viyārī ṇaṃ ||

4.110

ekkaṃ ca sayasahassaṃ tittīsaṃ khalu bhave sahassāiṃ |
nava ya sayā pannāsā tārāgaṇakoḍikoḍīṇaṃ ||

4.111

cattāri ceva caṃdā, cattāri ya sūriyā lavaṇatoe |
bāraṃ nakkhattasayaṃ, gahāṇa tinneva bāvannā ||

4.112

do ceva sayasahassā sattaṭṭhiṃ khalu bhave sahassā u |
nava ya sayā lavaṇajale tārāgaṇakoḍikoḍīṇaṃ ||

4.113

cauvīsaṃ sasi-raviṇo, nakkhattasayā ya tinni chattīsā |
ekkaṃ ca gahasahassaṃ chappannaṃ dhāyaīsaṃḍe ||

4.114

aṭṭheva sayasahassā tiṇṇi sahassā ya satta ya sayāiṃ |
dhāyaisaṃḍe dīve tārāgaṇakoḍikoḍīṇaṃ ||

4.115

bāyālīsaṃ caṃdā bāyālīsaṃ ca diṇayarā dittā |
kālodahimmi ee caraṃti saṃbaddhalesāyā ||

4.116

nakkhattasahassaṃ egameva chāvattaraṃ ca sayamannaṃ |
chacca sayā channauyā mahaggahā tinni ya sahassā ||

4.117

aṭṭhāvīsaṃ kālodahimmi bārasa ya sahassāiṃ |
nava ya sayā pannāsā tārāgaṇakoḍikoḍīṇaṃ ||

4.118

coyālaṃ caṃdasayaṃ, coyālaṃ ceva sūriyāṇa sayaṃ |
pokkharavarammi ee caraṃti saṃbaddhalesāyā ||

4.119

cattāriṃ ca sahassā battīsaṃ ceva hoṃti nakkhattā |
chacca sayā bāvattara mahaggahā bārasa sahassā ||

4.120

channaui sayasahassā coyālīsaṃ bhave sahassāiṃ |
cattāri taha sayāiṃ tārāgaṇakoḍikoḍīṇaṃ ||

4.121

bāvattariṃ ca caṃdā, bāvattarimeva dinayarā dittā |
pukkharavaradīvaḍḍhe caraṃti ee pagāsiṃtā ||

4.122

tinni sayā chattīsā cha cca sahassā mahaggahāṇaṃ tu |
nakkhattāṇaṃ tu bhave solāṇi duve sahassāṇi ||

4.123

aḍayālasayasahassā bāvīsaṃ khalu bhave sahassāiṃ |
do ya saya pukkharaddhe tārāgaṇakoḍikoḍīṇaṃ ||

4.124

battīsaṃ caṃdasayaṃ 132, battīsaṃ ceva sūriyāṇa sayaṃ 132 |
sayalaṃ manussaloyaṃ caraṃti ee payāsiṃtā ||

4.125

ekkārasa ya sahassā cha ppi ya solā mahaggahasayā u 11616 |
cha cca sayā channauā nakkhattā tinni ya sahassā 3696 ||

4.126

aṭṭhāsīiṃ cattāiṃ sayasahassāiṃ manuyalogammi |
satta ya sayā anūnā tārāgaṇakoḍikoḍīṇaṃ ||

4.127

eso tārāpiṃḍo savvasamāseṇa manuyalogammi |
bahiyā puṇa tārāo jiṇehiṃ bhaṇiyā asaṃkhejjā ||

4.128

evaiyaṃ tāraggaṃ jaṃ bhaṇiyaṃ taha ya manuyalogammi |
cāraṃ kalaṃbuyāpupphasaṃṭhiyaṃ joisaṃ carai ||

4.129

ravi-sasi-gaha-nakkhattā evaiyā āhiyā manuyaloe |
jesiṃ nāmā-goyaṃ na pāgayā pannaveiṃti ||

4.130

chāvaṭṭhiṃ piḍayāiṃ caṃdā''iccāṇa manuyalogammi |
do caṃdā do sūrā ya hoṃti ekkekkae piḍae ||

4.131

chāvaṭṭhiṃ piḍayāiṃ nakkhattāṇaṃ tu manuyalogammi |
chappannaṃ nakkhattā ya hoṃti ekkekkae piḍae ||

4.132

chāvaṭṭhī piḍayāiṃ mahaggahāṇaṃ tu manuyalogammi |
chāvattaraṃ gahasayaṃ ca hoi ekkekkae piḍae ||

4.133

cattāri ya paṃtīo caṃdā''iccāṇa manuyalogammi |
chāvaṭṭhiṃ chāvaṭṭhiṃ ca hoi ikkikkiyā paṃtī ||

4.134

chappannaṃ paṃtīo nakkhattāṇaṃ tu manuyalogammi |
chāvaṭṭhiṃ chāvaṭṭhiṃ ca hoi ikkikkiyā paṃtī ||

4.135

chāvattaraṃ gahāṇaṃ paṃtisayaṃ hoi manuyalogammi |
chāvaṭṭhiṃ chāvaṭṭhiṃ ca hoi ikkikkiyā paṃtī ||

4.136

te merumanucaraṃtī payāhiṇāvattamaṃḍalā savve |
aṇavaṭṭhiehiṃ joehiṃ caṃda-sūrā gahagaṇā ya ||

4.137

nakkhatta-tārayāṇaṃ avaṭṭhiyā maṃḍalā muṇeyavvā |
te vi ya payāhiṇāvattameva meruṃ anucaraṃti ||

4.138

rayaṇiyara-diṇayarāṇaṃ uḍḍhamahe eva saṃkamo natthi |
maṃḍalasaṃkamaṇaṃ puna abbhiṃtara bāhiraṃ tiriyaṃ ||

4.139

rayaṇiyara-dinayarāṇaṃ nakkhattāṇaṃ ca mahagahāṇaṃ ca |
cāraviseseṇa bhave suha-dukkhavihī manussāṇaṃ ||

4.140

tesiṃ pavisaṃtāṇaṃ tāvakkhettaṃ tu vaḍḍhae niyamā |
teṇeva kameṇa puṇo parihāyai nikkhamiṃtāṇaṃ ||

4.141

tesiṃ kalaṃbuyāpupphasaṃṭhiyā hoṃti tāvakhettamuhā |
aṃto ya saṃkulā bāhiṃ vitthaḍā caṃda-sūrāṇaṃ ||

4.142

keṇaṃ vaḍḍhai caṃdo? parihānī vā vi keṇa caṃdassa? |
kālo vā joṇhā vā keṇa'nubhāveṇa caṃdassa? ||

4.143

kiṇhaṃ rāhuvimāṇaṃ niccaṃ caṃdeṇa hoi avirahiyaṃ |
cauraṃgulamappattaṃ hiṭṭhā caṃdassa taṃ carai ||

4.144

bāvaṭṭhiṃ bāvaṭṭhiṃ divase divase tu sukkapakkhassa |
jaṃ parivaḍḍhai caṃdo, khavei taṃ ceva kāleṇaṃ ||

4.145

pannarasaibhāgeṇa ya caṃdaṃ pannarasameva saṃkamai |
pannarasaibhāgeṇa ya puṇo vi taṃ ceva pakkamai ||

4.146

evaṃ vaḍḍhai caṃdo, parihānī eva hoi caṃdassa |
kālo vā joṇhā vā teṇa'nubhāveṇa caṃdassa ||

4.147

aṃto manussakhette havaṃti cārovagā ya uvavannā |
paṃcavihā joisiyā caṃdā sūrā gahagaṇā ya ||

4.148

teṇa paraṃ je sesā caṃdā''icca-gaha-tāra-nakkhattā |
natthi gaī, na vi cāro, avaṭṭhiyā te muṇeyavvā ||

4.149

do caṃdā iha dīve, cattāri ya sāgare lavaṇatoe |
dhāyaisaṃḍe dīve bārasa caṃdā ya sūrā ya ||

4.150

ee jaṃbuddīve duguṇā, lavaṇe caugguṇā hoṃti |
kāloyaṇā tiguṇiyā sasi-sūrā dhāyaīsaṃḍe ||

4.151

dhāyaisaṃḍappabhiī uddiṭṭhā tiguṇiyā bhave caṃdā |
āillacaṃdasahiyā anaṃtarānaṃtare khette ||

4.152

rikkha-ggaha-tāraggaṃ dīva-samudde jaicchase nāuṃ |
tassa sasīhi u guṇiyaṃ rikkha-ggaha-tārayaggaṃ tu ||

4.153

bahiyā u mānusanagassa caṃda-sūrāṇa'vaṭṭhiyā jogā |
caṃdā abhiījuttā, sūrā puṇa hoṃti pussehiṃ ||

4.154

caṃdāo sūrassa ya sūrā caṃdassa aṃtaraṃ hoi |
paṇṇāsa sahassāiṃ [tu] joyaṇāṇaṃ anūnāiṃ ||

4.155

sūrassa ya sūrassa ya sasiṇo sasiṇo ya aṃtaraṃ hoi |
bahiyā u mānusanagassa joyaṇāṇaṃ sayasahassaṃ ||

4.156

sūraṃtariyā caṃdā, caṃdaṃtariyā ya dinayarā dittā |
cittaṃtaralesāgā suhalesā maṃdalesā ya ||

4.157

aṭṭhāsīiṃ ca gahā, aṭṭhāvīsaṃ ca hoṃti nakkhattā |
egasasīparivāro, etto tārāṇa vocchāmi ||

4.158

chāvaṭṭhisahassāiṃ nava ceva sayāiṃ paṃcasayarāiṃ |
egasasīparivāro tārāgaṇakoḍikoḍīṇaṃ ||

4.159

vāsasahassaṃ paliovamaṃ ca sūrāṇa sā ṭhiī bhaṇiyā 1 |
paliovama caṃdāṇaṃ vāsasayasahassamabbhahiyaṃ 2 ||

4.160

paliovamaṃ gahāṇaṃ 3 nakkhattāṇaṃ ca jāṇa paliyaddhaṃ 4 |
paliyacauttho bhāgo tārāṇa vi sā ṭhiī bhaṇiyā 5 ||

4.161

paliovama'ṭṭhabhāgo ṭhiī jahannā u joisagaṇassa |
paliovamamukkosaṃ vāsasayasahassamabbhahiyaṃ ||