Dvadasharanayacakra 1.139

1.139

tatra prativiviktarūpāntarāviviktasvatattve, pratyekaṃ viviktāni rūpāntarāṇi pratiparamāṇu vā rasādibhedena vā, teṣāmeva rūpāntarāṇāmaviviktaṃ svatattvaṃ yasya so'yamaviviktasvatattvaḥ . ko'sau ? rūpasaṅghātaḥ, rūpadhātubhedaparamāṇusaṅghātaḥ adhikṛtacakṣurviṣayābhimatarūpasaṅghāto vā . tasmin rūpasaṅghāte indriyasannikṛṣṭe svaviṣayyābhimukhyena upasthite ālambanaviparītā paramārthata ālambanabhūtebhyaḥ paramāṇubhyaḥ nīlam iti vā ghaṭaḥ iti vā yeyaṃ pratipattiḥ sā viparītā, tadagrahe tadbuddhyabhāvāt, balākāsu paṅktijñānavat, avyapadeśyaikātmakanīlarūpaviṣayā, vyapadeśyānekaparamāṇvālambanebhyo'nyo'vyapadeśya eka ātmā asyeti avyapadeśyaikātmakam, kiṃ tat ? nīlarūpam, tad viṣayo'syā iti avyapadeśyaikātmakanīlarūpaviṣayā abhimatā pratipattiḥ iti vartate . saiva vā pratipattiravyapadeśyā ekātmakānekaparamāṇunīlarūpaviparītaikanīlarūpaviṣayā, tadvyākhyānārthamabhidharmapiṭake bhavatāṃ yathocyate --nīlaṃ vijānāti, no tu nīlam iti . nāvyapadeśyā sā pratipattirityabhiprāyaḥ, taṃ pradarśayati --nanu hetvapadeśavyapadeśyaiva sā . yasmāduktam --heturapadeśo nimittaṃ liṅgaṃ pramāṇaṃ kāraṇamityanarthāntaram vai॰ sū॰ 9 . 2 . 4 iti . na cāvaśyaṃ śabdābhidheyameva vyapadeśyam, kiṃ tarhi ? yadyadarthāntareṇādhigamyate tattadvyapadeśyam, arthāntarasya hetvapadeśanimittādiparyāyatvāt . tavāpi ca yataḥ sañcayagrahaṇāpadeśena nimittāntarajanyami- ndriyajñānamiṣṭaṃ tasmād vyapadeśyaṃ tat . tathā coktam --sañcitālambanāḥ pañca vijñānakāyāḥ abhi॰ pi॰ iti, na sañcayālambanā iti . etasyārthanidarśanārthamudāharaṇamāha --dhūmeneva agniriva gṛhyate, yathā dhūmena arthāntarabhūtena agniratra iti jñānamutpadyamānaṃ vyapadeśyaṃ dṛṣṭaṃ tathaitadapi nīlarūpādiviṣayaṃ cakṣurādivijñānaṃ paramāṇubhirarthāntarairjanitatvād vyapadeśyam . tato'nyadityādi . tata eva yathā vyapadeśyaṃ tathā dhūmādagniriva tad nīlarūpaṃ tataḥ paramāṇubhyaḥ paramārthasadbhyaḥ anyat kalpitamakalpitebhya ekaṃ bahubhyaḥ sāmānyaṃ viśeṣebhyaḥ, na sākṣādindriyairavyavahitaṃ gṛhyate, kiṃ tarhi ? vyavahitamevārthāntaraiḥ paramāṇubhiḥ taddvāreṇa paramāṇudvāreṇa gṛhyate, na svata eveti .