Dvadasharanayacakra 1.203

Nyāyāgamānusāriṇī 1.203

Language: Sanskrit

1.203

atra pareṇobhayorvaidharmyapradarśanārthamathocyeta--nīlādisamudāya ityādi yāvat tadaṇvātmakatvāt tathāsattvāditi . nīlādisamudāye nīlādidravyasadākāraḥ paramārthasadākāraḥ sa vidyate . kiṃ kāraṇam ? tadaṇvātmakatvāt teṣāṃ nīlādīnāmaṇvātmakatvāt aṇūnāṃ dravyasattvāt . tatpratyakṣatvaṃ nyāyyam, nyāyādanapetaṃ nyāyyaṃ yuktamityarthaḥ, tadviṣayasya ca jñānasya pratyakṣatvaṃ tatpratyakṣatvam . na tu ghaṭādyākāro na tvasti ghaṭasaṅkhyotkṣepaṇādyākāraḥ, atatparamāṇutvāt, tasyākārasya paramāṇutvaṃ tatparamāṇutvam, na tatparamāṇutvamatatparamāṇutvam, ato'tatparamāṇutvāt . tataḥ kim ? tathā'sattvāt, tena prakāreṇāsattvāt paramāṇutvena teṣāṃ ghaṭādyākārāṇāmasattvāt .

Previous: 1.202
Next: 1.204
Up: 1

Linked texts (1)

Dvādaśāranayacakra — Mallavādin, Sanskrit