Dvadasharanayacakra 7.153

7.153

tadeva vyācaṣṭe --ekatve yo'yamityādi yāvad dravyasyāpi guṇatvam . yadi dadhimadhūdakādīnāṃ kuṇḍasaṅkīrṇānāmaviveke niyamena ayamasyaiva svabhāvaḥ ityaśakyamavadhārayituṃ saṃyoge dadhikuṇḍameva, madhukuṇḍameva, udakakuṇḍameva vā iti ekatvāt saṃyogasya sarveṇāpi sambandhāt, tathātrāpi yo dravyabhāvena sambandhaḥ sa eva guṇasyāpi iti etasmāt kāraṇāt prāptaṃ guṇatvaṃ dravyasyāpi guṇabhāvaḥ, dravyaṃ guṇo bhavatītyarthaḥ . guṇatvābhisambandhācca tasya dravyabhāvahāniḥ, evaṃ guṇabhāvāpattau dravyabhāvo hīyata iti pararūpatāmāpādya svarūpatyāgamāpādayati . tasyetyādi vyākhyānasādhanaṃ yāvad nivṛttiḥ . dravyaṃ guṇabhāvena sambaddhatvāt tyaktadravyabhāvaṃ guṇavaditi . evaṃ tāvad dravyasya guṇatvāpattirdravyatvatyāgaścānavasthāne .