Dvadasharanayacakra 7.60

7.60

kiñcānyat, idaṃ tu prasphuṭataramityādi . viśeṣaṇasya sattādravyatvādeḥ sambandhaḥ prakāśo'sminniti viśeṣaṇasambandhaprakāśaṃ vastu . tena vastunaiva prakāśyate viśeṣaṇamiti tadeva vastu prakāśanam . tena ca vastunā nāpekṣitaḥ sāmānyena saha sambandhaḥ, sāmānyameva vastunā saha sambandhamapekṣata iti tatsambandhaniyamāya tvayaivābhyupagatamiti darśayituṃ vacanopanyāsaḥ . katamasya vacanasyopanyāsaḥ ? ucyate— yaduktaṃ vastvātmāvadhāraṇe kṛte'tiśayābhāvād viśeṣasambandhābhāva iti codite vikalpāntareṇa parihāravacanaṃ tad vyaktataraṃ vastvevārthāntaranirapekṣaṃ viśeṣaṇānāmapi prakāśakamiti . tadyathā --yaduktam athavā viśeṣaṇasambandhamantareṇāpi vastumātrāṇāṃ parasparātiśayo'sti, tena viśeṣaṇasambandhaniyamasiddhiḥ ityetad vacanaṃ yathoktakāraṇasāmagryasadbhāvaviśeṣāviśeṣanyāyaprāṇakamiti .