Dvadasharanayacakra 7.63

7.63

atra prayogāḥ --na dravyādi anyādheyasvaprakāśam, nānyenādheyo'sya dravyādeḥ prakāśa iti pakṣaḥ, nādheyasattvādiviśeṣaṇaṃ dravyādi nāpratipūrṇasattvādiviśeṣaṇamiti vā pakṣaḥ, sattvāt, yat sad na tadanyādheyasvaprakāśaṃ nādheyasattvādi nāpratipūrṇasattvādi dṛṣṭam, sāmānyādivat, yathā sāmānya sātmakatvāt pratyekaṃ sattvāt svabhāvasadbhūtatvāt sāmānyādivat . asadeva vā syāt sattvasamavāyalabhyasadbhāvatvāt kāryavat . tasmād na satāmapi dravyādīnāṃ satkarī sattā vyarthatvāt iti sādhūktam . nāpi sadasatāṃ satkarī sattā abhūtatvāt sadasadātmakatvasya tvanmatenaiva khapuṣpavat . yā tu tvayoktopapattiḥ sadasadaikātmyānupapatteḥ iti sā nopapattiḥ, tvanmatenaiva sadasadaikātmyopapatteḥ . atyantāviruddhatvāt sadasadātmakaṃ kāryaṃ prāk sattāsambandhādapi, sāmānyādidravyāditadatatsadasadvat . sāmānyādīni svātmanā ... ... ...svasantyapi na bhavanti . viśeṣasamavāyāḥ santo nānyaprakāśā nādheyasattvādayo nāpratipūrṇasattvādayaḥ tathā dravyādīni . evaṃ sātmakatvāt pratyekaṃ sattvāt svabhāvasadbhūtatvāditi hetavaḥ, mūlahetoreva paryāyavācino vā . evamanabhyupagame asadeva vā syāt sattvasamavāyalabhyasadbhāvatvāt, sattvasamavāyena labhyaḥ sadbhāvo'syeti dravyādyutpannamātraṃ trayamabhisambadhyate . kāryavaditi kāraṇāvasthāyāṃ yat kāryaṃ sa dṛṣṭāntaḥ . nanvevaṃ sattvasamavāyalabhyasadbhāvaṃ tasyāmavasthāyāṃ kāryaṃ na bhavatīti cet, na, tvayaiva niṣṭhāsambandhayorekakālatvābhyupaga- mena parihṛtatvāt .