Dvadasharanayacakra 7.70

7.70

atrāha--nāhaṃ jainendratvamabhyupaimi, na cāviviktaprajñān prati saṃvṛṇomi . nanu mayā vigṛhyaivātra vādaḥ sadasatorvaidharmyāt kārye sadasattā na vai॰ sū॰ 9 . 1 . 12 ityanena sūtreṇa . sa punarvādaḥ siddhārthasutamatāvalambinaṃ sadasadaikātmyavādinaṃ tvāmevoddiśya . yaducyata ityādi saiddhārthīyamatapradarśanārthaḥ pūrvapakṣaḥ . te hi saiddhārthīyāḥ sadasadekātmatvaṃ vastuno'bhilaṣanta itthamupapattiṃ brūyuḥ, tadyathā --upādānaniyamadarśanāt sat kāryaṃ tilatailavat, tatkriyādyasattvadarśanādasad vīraṇeṣviva ghaṭo mṛdyapīti . itarathā atyantāsatkāryavāde na syādupādānaniyamaḥ khapuṣpasyeva, atyantasati ca tantvavasthāyāmeva paṭe darśanādasat, dṛṣṭaṃ tāvat... ... ..., itarathā tantupāṃsvādiṣvaviśeṣaḥ prāgapi vyāpārābhāvaśca syāt, dṛṣṭā tu kriyā... ... ..., ubhayaikānte doṣadarśanāt sadevāsadeva veti cāyukta ekāntaḥ, sadasadātmakatvāt kāryasya upādānaniyamaḥ kriyā ca yujyate' iti, tanna, vikalpānupapatteḥ . sadevāsat sadasat svenaivātmanā saccāsacca anyenātmanā sad...ghaṭātmanā cāsat ? na tāvat... ... ...asattvapratipakṣaśca sattvam . sat sopākhyamasannirupākhyam... ... ...sadasattvaṃ na bhavatītyarthaḥ . atra sato'satpratipakṣatvamasiddhaṃ tadaṅgatvāt tadātmakatvāt tatpravṛttitvāt ghaṭorddha- paṭārthā kuvindasya kriyā na syāt . upādānaniyamatadarthavyāpārau sadasattve kāryasya hetū, dṛṣṭaṃ tāvadityādinā samarthayati . aniṣṭaṃ cāpādayati--tathānicchataḥ tantupāṃsvādiṣvaviśeṣaḥ syādupādānamevānupādānameva vā, labdhātmapadārthakārakavyāpārābhāvavat prāgapi vyāpārābhāvaḥ syāditi ca yathāsaṅkhyam . nigamayati yathāsambhavaṃ dṛṣṭā tu kriyetyādi . ubhayaikānte doṣadarśanāditi sadevā'sadeva cetyekānte . sadevāsadeva veti cāyukta ekāntaḥ, sadasadātmakatvāt kāryasya satpakṣamāśrityopādānaniyamo yuktaḥ, asatpakṣamāśritya kriyā yukteti . yadetat saiddhārthīyaṃ mataṃ tanna, vikalpānupapatterityādi . sadevāsat sadasadityādi pratyuccāraṇaṃ saṃkṣepeṇa vikalpadbayena sopapattikaṃ svenaivātmanā saccāsacca anyenātmanā saditi yāvad ghaṭātmanā cāsaditi .