Lilavatisara p247

p247

[114-125 chāyayā tava vaṃśasya bhūbhṛto'tyunnatā api || saśrīkāḥ syuraparathā vicchāyatvaṃ bhajanti te ||114 tat paradārasaṅgena kiṃ tacchāyāṃ vilumpasi | svāmistadayamudyogo na śubhena phalegrahiḥ ||115 na yadatra paratrāpi paradārābhilāṣitā | praśasyate vipaścid bhistadasyā virama prabho ||116 ityuditvā'visaṃvādisacive maunamāsthite | sāhakāraruṣāṭopamūce vimalavāhanaḥ ||117 yata eva hi vaṃśo me'nyavaṃśebhyaḥ samucchitaḥ | ata eva hi yujyante kāntā muktā ihaiva hi ||118 kiñca santyeva me gehe'pyatikalpalatāḥ priyāḥ | priyaṅgulatayā kārya kiṃ nu me'sti tadīyayā ||119 paraṃ dūtamukhenaiṣa evamevaṃ yadabravīt | taddoṣasyauṣadhaṃ dātumevāsmyevamupakrame ||120 samarthavigraheṇaiva vyajyate svabhujo'rjitam || saiṃhikeyo vigṛhṇāti pūrṇamevendumādarāt ||121 tadatra yātrārambhe māṃ yaḥ kaścana niṣetsyati | kaṇṭhaśoṣāt paraṃ kiñcinna phalaṃ tasya setsyati ||122 tataḥ prage tataḥsthānādaskhalitaiḥ prayāṇakaiḥ |
kramāt taraṅgiṇī prāpa sa rājā tuṅgaśaṅgiṇīm ||123 yā'stāghā śubhasaṃyateva janatāsantāpasaṃhāriṇī
__yā tāruṇyavatīva mañjulakucaprāgbhārasaṃdhāriṇī | yā grāmīṇasabheva santatajaḍastomāvaruddhāntarā
yuddhorvīva ca yā'tidustaramahākallolamālākulā ||124 tīropāntapratiṣṭhān bakulavicakilāśokapunnāgapūgāṃ
__ stālīhintālaśālāṃstilakakurabakān nālikerān rasālān | atyunnamrān svakamrāniva sumanayanaiḥ prekṣamāṇānabhīkṣṇaṃ
yā cāśleṣṭuṃ kilocchālitagaganatalālambikallolabāhuḥ ||125