Lilavatisara p367

p367

[254-267 iti sābhinayaṃ tena naṭenākheṭa āntare | gīte pramuditā saṃsat sarvasvaṃ dātumaihata ||254 atha cintayāñcakāra kumāraḥ sthiradhāraṇaḥ || aye prābhātikapāṭhiprāyaḥ ko'pyeṣa no pumān ||255 vyājahāra kumāro'tha bho bhoḥ sukṛtiśekhara | naṭarūpeṇāmunā kiṃ svaṃ rūpaṃ prakaṭīkuru ||256 prādurāsīt tato divyālaṅkārairbhāsuraḥ suraḥ | jagāda ca śrīkumāraṃ sāvadhānaṃ niśāmaya ||257 rantvā ratnavimāneṣu kiṃ rajyasyaśmaveśmaṣu || tyaktvā ca tān ratnarāśīn kā saktirmaline dhane ||258 bhuktvā ca taruṇīdivyā rāgo'śucyabalāsu kaḥ | muktvā cāṃśukabhūṣāstāḥ kutsitāsvāsu kā ratiḥ ||259 divyāṅgarāgairālipyāṅgarāgeṣveṣu kā spṛhā | sthitvā tādṛk parīvāre kā khale'tra jane sthitiḥ ||260 kumāro vyāharat suṣṭu tvayā'śikṣīndrajālakam || tato'smi tuṣṭo yācasva svecchayā svamanīṣitam ||261 suro'tha cintayāmāsa hā kimevaṃ lapatyasau | durlabhabodhiko'yaṃ kiṃ yadityukto na budhyate ||262 prayuktāvadhinā tena jñātaṃ netyeṣa bhotsyate | tat prāpyāvasaraṃ kiñcid bodhyo'yamiti cetasā ||263 suro dṛśyetaro jajñe peṭakaṃ cāsya dhāmavat | smitvā kumāro'vaka ko'pi mohayiṣyati māmapi ||264|| yugmam dvitīye'hni namaskṛtya pitaraṃ jayaśekharam | tadāsthānasarasyasthāt kumāro rājahaṃsavat ||265 anye'pi mantrisāmantapramukhā rājapauruṣāḥ || cakravākādaya iva niṣedustatra sarvataḥ ||266 atrāntare candrapurāccandraśekharabhūpateḥ || dūtastatrāgato natvopaviṣṭo'pracchi bhū bhujā ||267