Lilavatisara p89

p89

[243-256 atha pāṭhapathapraṣṭhaiḥ prātarmaṅgalapāṭhakaiḥ | bhūpraṣṭhasya puraḥ peṭhe prātarmaṅgalamujjvalam ||243 tataste bhūbhujā pṛṣṭāḥ kenādya paṭhitaṃ puraḥ | dhvānenāśrutapūrveṇānudhvānitadigambaram ||244 te'pyūcuḥ śrutamasmābhistadivyadhvaniḍambaram | niṣpuṇyakariva nidhistadvaktā naikṣi kaścana ||245 tato dadhyau nṛpo manye kenacid dharmabandhunā | divyena matprabodhāya peṭhe dharmyamidaṃ vacaḥ ||246 parīkṣya taddharmatattvaṃ saha dharmaviśāradaiḥ | mayopādeyamevaṃ syād vaca etatphalegrahi ||247 sampradhāryeti dhātrīśaḥ prātarāsthānamaṇḍape | | dharmasvarūpaṃ papraccha sarvānāhūya tīthikān ||248 tataḥ kaścid dhṛṣṭamatiḥ spaṣṭamācaṣṭa bhūbhuje | gurūpadeśato dharmasvarūpaṃ te nirūpyate ||249 deva vastusvabhāvo'yaṃ dharmaḥ sa ca śubhāśubhaḥ | jīvābhāvānna ko'pyanyo dharmo'nyabhavagāmukaḥ ||250 jīvo rūpādyabhāvānnādhyakṣaḥ kasyāpi bhūpate | nāpyahaṃpratyayagrāhyo vikalpo'tha vinā hyayam ||251 nā'numeyo'numānaṃ hi pratyakṣāviṣaye katham | taddhi vyāptibalāt sā ca nityāt pakṣe kathaṃ bhavet ||252 mānaṃ na vā'numānādi yataḥ pratyakṣameva tat | tadagrāhyaśca jīvo na tanna karma śubhāśubham ||253 yaccocyate tadabhāve kathaṃ viśvavicitratā | nirjīveṣu kulālasya bhāṇḍeṣu nanu sā katham ||254 kānāstyātmā na karmāsti paraloko na vidyate | dharmo vastusvabhāvastat tannimittā vicitratā ||255 nāstikoktamiti śrutvā dūnaḥ smāha nṛpaḥ parān | bhoḥ satyamityasatyaṃ vā mṛṣā cet tannirasyata ||256