Samaraiccakaha 2.2

2.2

atthi ihēva jambuddīvē dīvē aravidēhē khettē aparimiyaguṇanihāṇaṁ tiyasapuravarāṇugāri ujāṇārāmabhūsiyaṁ samatthamēiṇitilayabhūyaṁ jayaüraṁ nāma nayaraṁ ti.jattha surūvō ujjalanēvatthō kalāviyavakhaṇō lajjāluō mahilāyaṇō, natya ya paradāraparibhōyammi kilīvō, paracchiddāvalōyaṇammi andhō, parāvavāyabhāsaṇammi mūō, paradavvāvaharaṇammi saṁkuciyahatthō, parōvayārakaraṇēkatallicchō purisavaggō.tattha yaṁ nisiyanikkaḍiyāsiniddaliyadariyariuhatthimasthaücchaliyabahalaruhirārattamuttāhalakusumapayaracciyasamarabhūbhibhāō rāyā nāmēṇa purisadattō tti.dēvī ya sē sayalantēurappahāṇā sirikantā nāma.sō imāē saha nirupamē bhōē bhugjim.iō ya sō candāṇa ṇavimāṇāhibaī dēvō ahāuyaṁ pāliūṇa taō cuō sirikantāē gambhē ucavannī tti.divō ya ṇāē suviṇayammi tīē cēva rayaṇīē nikhamasihisihājālasarisakēsarasaḍābhārabhāsurō vimalaphaliha-maṇisilā-nihasa-haṁsa-hāradhavalō āpiṅgalavaṭṭasupasantalōyaṇō miyaṅkalēhāsarisaniggayadāḍhō pihulamaṇaharavacchatthalō aïtaṇuyamajhabhāō suvaṭṭiyakaṭṭhiṇakaḍiyaḍō āvaliyadīhalaphūlō supaïṭṭhiōrusaṁṭhāṇō ki bahuṇā, sabbasundarāhirāmō sīhakisōragō vayaṇēṇamuyaraṁ pavisamāṇō tti.pāsiūṇa ya taṁ suhaviuddhāra jahāvihiṇā siṭṭhō daïyassa.tēṇa bhaṇiyaṁ — aṇēyasāmantapaṇivaïyacalaṇajuyalō mahārāyasahassa nivāsaṭṭhāṇaṁ puttō tē bhavissaï.tō sā taṁ paḍisuṇēūṇa jahāsuhaṁ ciṭṭhaï.pattē ya uciyakālē mahāpurisagambhāṇubhāvēṇa jāō sē dōhalō.jahā-dēmi sabasattāṇamabhayadāṇaṁ, dīṇāṇāhakivaṇāṇaṁ ca issariyasaṁpayaṁ, jaïjaṇāṇaṁ ca uvaṭṭhambhadāṇaṁ sabbāyayaṇāṇaṁ ca karēmi pūyaṁ ti.nivēiō ya imō tīē bhattārassa.amahiyajāyaharisēṇaṁ saṁpāḍiō ya tēṇaṁ.tassa saṁpāyaṇēṇa jāō mahāpamōō jaṇavayāṇaṁ.avi ya —