Yashastilaka 3.159

3.159

karaṇaiḥ | bhujastambhālānāt dordaṇḍastambhavandhanāt iyaṃ pratyakṣībhūtā ramāsindhuravadhūrapi lakṣmīkareṇurapi vaśaṃ nītā svavaśe kṛtā | rūpakālaṃkāraḥ ||
latetyādi | idaṃ pratyakṣībhūtaṃ māmakaṃ madīyaṃ hṛdayaṃ manaḥ araṇyānīrmahāntyaraṇyāni upāśritya parasthānāvāptermokṣasthānaprāptervijayi jayavad bhavatādbhūyādbhavatu | araṇyānīḥ kathaṃbhūtāḥ| latākāntāramyāḥ latā vallyastā eva kāntāḥ striyaḥ komalaśarīralatābhī ramya atimanoharāḥ | punaḥ kathaṃbhūtā araṇyānīḥ | taruparijanākīrṇavasudhāḥ taravaḥ vṛkṣāsta eva parijanāḥ kuṭumbavargāḥ duḥsahaparitāpanivārakatvāttairākīrṇā vyāptā vasudhā bhūmiryāsu tāstathoktāḥ | araṇyānīḥ punaḥ kathaṃbhūtāḥ | taṭīprāsādāḥ parvatā eva mandirāḥ yāsu tāstathoktāḥ | punaḥ kathaṃbhūtāḥ araṇyānīḥ | kamalasuhṛdānanditabhuvaḥ kamalā mṛgāsta eva suhṛdo mitrāṇi purastādāśritatvāttairānanditāḥ ānandaṃ prāpitā śobhitā bhūmiryāsāmaraṇyānīnāṃ tāstathoktāḥ | araṇyānīḥ punaḥ kathaṃbhūtāḥ | lakṣmīriva rājyalakṣmīsadṛśāḥ | rūpakopamālaṃkāraḥ ||